Dili – Irmán sira komundade Eusebia Palomino, ohin, 30 Juñu 2021, konklui sira-nia estudu, reflesaun no sharing kona-ba ensíklika Fratelli Tutti ne’ebé sira hahú iha fulan Fevereiru, hodi halo selebrasaun hamutuk iha orasaun.
Iha orasaun, depoizde rona fali Maromak nia Liafuan kona-ba Samaritanu Di’ak (Lc 10,25-37) no Amu-Papa Francisco nia komentu iha Fratelli Tutti, Irmán ida-idak hili empeñu ida bazeia ba Kapítulu 7 (Dalan sira ba enkontru foun) no 8 (Relijiaun sira ba servisu fraternidade nian iha mundu) Fratelli Tutti nian atu moris tuir.
Buat ne’ebé sira hili atu haka’as an iha moris pesoál no komunitária mak liuliu haburas arte dame nian, respeitu, diálogu no rekonsiliasaun. Pontu sira seluk mak: loke an, valoriza no respeita; halo primeiru pasu atu dialoga no rekonsilia; brani halo diálogu atu buka “bem comum” no promove paz; dedika tempu nu’udar komunidade atu sai no fó tulun ba ema sira ne’ebé presiza; serbisu ho matenek no kriatividade; domin no solidariedade; ko’alia di’ak kona-ba ema seluk; haraik-an no perdaun.
Depoizde halo empeñu, sira hasa’e ba Maromak Papa Francisco no Iman Boot Ahmad Al-Tayyeb sira-nia apelu ba dame, justisa no fraternidade (FT 285) hodi husu Na’i nia tulun.
Testu kompletu momentu selebrasaun nian bele haree iha parte rekursu nian iha website ne’e.
(JG)
