Hakle’an identidade karizmátika FMA nian

Dili – Hodi hahú Segundu Novisiadu iha loron 28-6-2021 ho Madre Provinsiál Me.Alma FMA ho introdusaun ne’ebé dehan: Segundu Novisiadu ba fulan daruak nian mak tempo atu reflete no avalia fali ami nia moris hodi kontempla ami nia ain hakat ida-idak ne’ebé liu tiha ona no hateke ba oin ho aten brani hodi le’e fali elementu sira  esensiál iha ita nia identidade nu’udar FMA. Hanesan  Amu  papa dehan: Segundu Novisiadu mak momentu atu hatasak ita nia konxiénsia  ho nia objetivu atu dixerne ninia dalan vokasaun  nu’udar FMA no hafoun laran-manas ba foin-sa’e sira nia salvasaun. Tempu hanesan atu le’e fali ho atitude dixernimentu nian iha dalan vokasionál atu deskobre Maromak  moris-na’in liu husi sinál sira.

IDENTIDADE INSTITUTU FMA NIAN

Husi loron 28-6 to’o 3/7/2021, ami hahú formasaun Segundu Novisiadu nian ho Ir. Olga Belo FMA, ne’ebé gia no orienta ami ho tema Identidade Institutu FMA nian. Institutu mak don Espíritu Santu nian no hetan intervensaun direita husi Maria, nune’e Don Bosco hari nu’udar resposta ba aspirasaun kle’an liu ba foin-sa’e sira hodi transmite patrimóniu espirituál inspira husi karidade Kristu Bibi-Atan Di’ak no imprime impulsu misionáriu ida ne’ebé forte. Kreda rekoñese Sistema Preventivu mak nu’udar espiritualidade esensiál no métodu espesífiku iha misaun edukativa. Motto Da Mihi Animas Cetera Tolle ne’ebé sai ita nia objetivu ba misaun edukativa ne’ebé distinge ita nia Família Saleziana, FMA asume ninia identidade hodi kolabora ho kreda ba misaun salvasaun foin-sa’e sira nian iha Kreda. Ninia elementu esensiál mak: razaun, relijiaun no Amorevolezza.

Ho formasaun ida ne’e tulun ami hodi hare fila fali ami nia esperiénsia ne’ebé ami liu ona hodi renova filafali ami nia ain-hakat ida-idak atu kontinua sai fiel liután ba ami nia indentidade nu’udar FMA. Iha tempu hanesan molok ami tama iha identidade FMA nian, ami hala’o atividade ida kona-ba ami nia identidade rasik, hodi koñese no simu ami nia-an rasik nu’udar Maromak nia ilas. Nune’e, fasilita liután ami atu hakle’an fila fali identidade Karizma FMA nian ne’ebé ami moris dadaun. Tanba ami mak monumentu moris agradese nian ba Maria ne’ebé Don Bosco rasik hakarak agradese ba Nain ba obra hotu ne’ebé nia hala’o. Ho ne’e Madre Mazzarello hamutuk ho irmán sira dahuluk hodi fó orijen ba Espíritu Mornese nian ho fidedelidade kriativa, dudu mós ami atu sai laran manas liutan iha misaun loro-loron nian ho Espíritu Valdocco no Mornese nian iha ami nia komunidade.

Iha loron ikus nian ami halo sínteze kona-ba Identidade FMA nian husi  artigu 1-7 hodi taka ho Lectio Divina husi Evanjellu Saun Jo. 15-16. Ikus nian ho fuan nakonu ho gratidaun ami agradese Ir. Olga ne’ebé ho disponibilidade tomak hodi fó nia tempu atu akompaña ami durante loron hirak ne’e atu ami sai tasak liutan iha ami nia identidade nu’udar FMA.

(Ir Onesiana Baptista FMA)