Dili – Ohin Domingu datoluk tempu Adventu nian mak Domingu ksolok ka Gaudete. Oratorianu Ceferino Namucurá (Komunidade B.Eusebia Palomino) sira husi Centro B no E selebra Natál hamutuk, hodi konvida labarik ida-idak atu prepara sira nia fuan ba Jezús ne’ebé sei mai.
Uluknanai ami hahú ho Orasaun, hafoin pinta deseñu ba prezépiu natál nian, boatarde husi Madre Julia Fernandes ne’ebé ko’alia kona-ba Laudato sí. Hafoin ami halo pawai kona-ba Ekolojia, maski udan boot, rai lakan, bee sae maibé la la impede labarik sira nia ksolok. Iha pawai ekolojia ida-ne’e labarik ida-idak aprezenta liafuan badak nu’udar sira nia empeñu ba ekolojia Laudato sí no sira prepara an ba Jezú nia hiit An mai. Sira nia empeñu mak: preprara uma fuan nian ba Jezús, keta soe foer arbiru, kuda ai-funan iha uma oin, tau matan ba animál sira, keta estraga hahán, keta soe botil no hapara atu uza plástiku. Ho liafuan hirak ne’e hafanu liután sira atu konxiente no hadomi kriasaun Maromak nian. Ikus liu ami fó benvinda ba Ir Martinha Gomes no agradese Ir Teresa de Carvalho no merenda hamutuk, hafoin fahe malu. Labarik ida-idak fila ba uma maski la’o iha udan no bee laran maibé sira fila ho ksolok no s
ira mak sai manu-ain iha sira nia família laran.
Oratorianu Sentru E selebra Natál hamutuk hodi prepara labarik sira nia prezépiu fuan nian hodi simu Kosok-Oan ne’ebé sei mai lori Dame, Domin no Ksolok mai ita ida-idak. Molok ami hahú ami nia atividade, ami reza Ave Maria ida hodi hanoin filafali Na’i-Feto Imakulada Konseisaun no mós hanoin ba Don Bosco nia misaun ne’ebé hahú ho foin-sa’e Bartolomeu Garelli. Ami sente kontente ho atividade simples ne’ebé ami prepara: Orasaun, Jogu sira no merenda hamutuk. Maibé tanba udan, rai-lakan no mota tun, ami, labarik, inan no aman sira preokupa basá ki’ik sira labele liu mota, nune’e ema boot sira mak ajuda hodi hakur mota. Ho Na’i-Feto nia tulun no akompañamentu buat hotu la’o ho di’ak.
(Ir.Sidonia Paula-Vitoria Belo)
