Dili – Escola Católica Maria Auxiliadora adere ba Laudato Si’ Platform hodi implementa ninia objetivu hotu. Nune’e mak iha eskola buka atu inklui matéria ambiente nian no mós hanorin Sosiál Kreda nian. Ba tinan ne’e, grupu ka asosiasaun sira la’o hamutuk atu kuda mentalidade ekolójika tuir Laudato Si’ nia hanorin no pratika iha moris.
Nune’e mak, ohin, 5 Fevereiru 2022, “sábadu ekólojiku”, iha atividade extrakurrikulár, labarik no foin-sa’e sira husi Segundo-Terceiro Ciclo, halo formasaun iha sira-nia grupu no aplika ho atividade ekolojia nian: “moris ne’ebé moos, fuan ne’ebé moos, hahalok ne’ebé moos, iha nia sentidu hotu”.
Grupu sira halo limpeza iha eskola nia sorin-sorin, identifika lixu tuir ninia tipu hanesan plástiku, lata, vidru, surat-tahan no órganiku no uza botil plástiku atu resikla sai lixu-fatin. Asosiasaun Auxilium, Laura no OPIAM ki’ik-oan sira ba hamoos iha valeta bairru sira husi merkadu to’o iha parókia. Grupu Don Bosco loron ida ohin, sira dedika ba formasaun kona-ba ekolojia, selebrasaun no halo pawai.
Planu seluk ne’ebé iha mak halo estrume orgániku ne’ebé mestre Júlio mak responsvel. Nune’e lixu orgániku sira lori bá hotu iha rai-kuak ne’ebé prepara ona atu nia sai dodok no transforma ba estrume. Aleinde-ne’e, sei kuda mós ai-hun iha fatin sira ne’ebé identifika ona.
Kona-ba hatán ba ema kiak nia hakilar, labarik no foin-sa’e sira sei halo sira-nia kaixa osan nian, no sei halibur semana-semana osan-rahun ne’ebé sira iha no bele hasai husi sira-nia merenda atu ikusmai iha tempu kuarezma bele uza atu tulun maluk kiak sira.
Labarik tulun labarik, foin-sa’e apóstolu foin-sa’e nian, ne’e mak ita-nia objetivu edukasaun nian, hanesan Don Bosco rasik hanorin no halo. Halo foin-sa’e sira sai protagonista, sarani di’ak, sidadaun onestu.
(COMSOC FMA-TIN)
