Dili/Comoro 8 Setembru – Ohin kreda selebra natividade Virjen Maria nian, iha loron hanesan Irmán sira iha Inspetoria TIN ho ksolok Magnificat nian selebra fidelidade ba Na’i hamutuk ho irmán sira; Ir. Celina seran, Ir. Domingas da Costa, Ir. Evangelina Xavier , Ir. Natalia da Silva, Ir. Simoa Correia, Ir. Virgilia Gaio, Ir. Virgilia Marçal, selebra tinan 25 no ho Ir. Cecilia del Mundo ne’ebé selebra tinan 50 iha moris konsagrada Salesiana.
Selebrasaun ne’e ho Eukaristia ne’ebé prezide husi Mons. Marco Sprizzi no Provinsiál SDB Pe. Anacleto Pires no ho konselebrante na’in 11. Iha omilia Monsenhor fó mensajen ba irmán jubilante sira katak; Maria nia papel mak sai Jezus nia inan nia hatán Sin ho liberdade ba Na’i nia bolu, nune’e mós imi nia fidelidade ba Na’i ne’ebé hatán ba nia bolu iha tinan 25 no tinan 50 hodi saran imi an ba Kristu atu sai inan. Iha Timor Leste ema bolu imi madre, ne’e tanba konsidera responsabilidade atu sai inan loloos nian. Maria sai Jezús nia Inan to’o nia halao nia knar espiritu inan nian ba umanidade tomak. Imi sai inan atu hadomi ho dalan espesiál liu tuir imi nia karizma saleziana mak sai inan edukadora no inan formadora sira. Inan loos nian mak eduka labarik sira la’ós ho autoritaria maibé eduka ho ezemplu no sasin. Hanesan 
Maria eduka Jezús wainhira nia sei adolexente bainhira nia lakon iha templu. Eduka tuir métodu Amorevolezza Salesiana ba foin-sa’e sira espresa atitude domin inan nian partikular liu ba imi Filhas de Maria Auxiliadora nian. Atitude inan nian ikus mak atu serbi, loron loron imi harii kreda ho domin inan nian iha fidelidade ba karisma nu’udar inan edukadora ho imi-nia sasin moris nian.
Depois de Eukaristia kontinua ho fraternizasaun nu’udar familia hamutuk ho irmán sira husi kongregasaun Dominicana, Canosiana, SPC no Vitoriana nune’e mós ho Salezianu sira.
Hafoin mensajen husi madre Alma ba jubilaria sira no mos ba ema hotu ne’ebé prezente hodi dehan katak; selebrasaun ba tinan 25 no 50 buat ruma espesial nafatin maibe tanba selebra iha tinan 150 mak sai epesial dala rua. Tinan ida ne’e ita reflete konaba ita nia hola parte iha institutu, sira ne’e tenke hatudu liutan sira nia domin ba institutu, sira nia fidelidade sai puntu referimentu ba ita hotu. Ita reza atu selebrasaun tuir mai fó fuan no ita hotu responsavel atu vokasaun mai, maibé liu liu sira ne’ebé ohin halo selebrasaun atu dada vokasaun barak.
(Alice Filipe FMA)
