Papa Francisco nia lia-menon molok harohan Angelus, 13 Novembru 2022.
Maun no biin-alin sira, buongiorno, buona domenica!
Evanjellu ohin nian lori ita ba Jerusalém, iha fatin sagradu liu: templu. Iha-ne’ebá, hale’u Jezús, ema balun ko’alia kona-ba edifísiu boot ne’e ninia furak «hafutar ho fatuk furak sira» (Lc 21,5). Maibé Na’i afirma: «Husi buat ne’ebé imi haree, la iha fatuk ida mak ema sei la harahun» (v. 6). Hafoin nia aumenta intensidade, hodi esplika oinsá iha istória buat hotu namtate: sei iha, nia dehan, revolusaun no funu sira, rai-nakdoko no hamlaha, peste no persegisaun (kf vv. 9-17). Atu hateten: keta tau konfiansa demais ba realidade sira rai nian: sira liu. Ne’e mak liafuan matenek nian, maibé bele halo ita laran-noruk: buat barak mak la’o la loos ona tanba sá mak Na’i mós halo diskursu negativu nune’e? Iha realidade ninia intensaun la’ós negativu, buat sleuk, katak hariak mai ita hanorin folin boot, katak dalan atu sai husi prekariedade ida-ne’e. No sá loos dalan sai nian? Oinsá ita bele sai husi realidade ne’ebé liu no liu no sei la iha tan?
Ita hetan iha liafuan ne’ebé karik halo ita hakfodak. Kristu revela iha fraze ikus Evanjellu nian, bainhira dehan: «Ho imi-nia perseveransa imi sei soi imi nia moris» (v. 19). Perseveransa. Saida mak perseveransa? Liafuan ne’e hatudu “severu liu”, maibé “severu” iha sentidu sá loos? Ho an rasik, hodi hanoin katak la iha kbiit? Lae. Ho ema seluk, hodi sai toos no la fleksivel? Lae mós. Jezús husu atu sai “severu”, dixiplinadu, metin iha buat ne’ebé ba Nia importante, iha buat ne’ebé importante. Basá, buat ne’ebé folin, dalabarak la la’o ho buat ne’ebé dada ita-nia interese: dalabarak, hanesan ema sira templu nian, fó liu prioridade ba ita-nia liman nia obra sira, ba ita-nia susesu sira, ba ita-nia tradisaun relijioza no sivíl sira, ba ita-nia símbolu lulik no sosiál sira. Ida-ne’e di’ak, maibé ita fó demais prioridade. Sira importante, maibé liu. Jezús fali hateten atu konsentra an iha buat ne’ebé hela nafatin, atu evita dedika moris atu harii buat ruma ne’ebé ikusmai ema harahun, hanesna templu, no haluha atu harii buat ne’ebé la namtate tun, atu harii iha Ninia liafuan, iha domin, iha hahalok di’ak. Sai perseverante, sai severu no desididu atu harii iha buat ne’ebé la liu.
Ida-ne’e mak perseveransa: harii loron ba loron hahalok di’ak. Persevera katak sai konstante iha hahalok di’ak, liuliu bainhira realidade hale’u ita dudu ita atu halo buat seluk. Ita halo ezemplu ruma: ha’u hatene katak harohan importante, maibé ha’u mós, hanesan hotu-hotu, iha nafatin buat barak atu halo, nune’e ha’u husik ba depois: “Lae, ha’u okupada, ha’u labele, ha’u halo depois”. Ka ha’u haree ema espertu barak ne’ebé aproveita situasaun, ne’ebé evita regra sira, no ha’u mós para atu observa regra sira, atu persevera iha justisa no iha legalidade: “Maibé se espertu sira-ne’e halo, ha’u mós halo”. Atensaun ba ida-ne’e! Seluk tan: ha’u halo servisu ida ba Kreda, ba komunidade, ba ema kiak sira, maibé ha’u haree katak ema barak iha tempu livre nian hanoin de’it atu diverte, entaun ha’u hakarak husik no halo hanesan sira. Tanba ha’u la haree rezultadu ka ha’u sai bosan ka la halo ha’u haksolok.
Persevera, iha kontráriu, firme iha hahalok di’ak. Ita husu ba an rasik: oinsá ha’u-nia perseveransa? Ha’u konstante ka ha’u moris iha fiar, justisa no karidade tuir momentu sira: ha’u harohan se ha’u iha vontade, ha’u korretu, disponivel no servi-na’in se konveniente, enkuantu, se ha’u la satisfeitu/a, se ema ida la agradese ha’u, ha’u para? Atu habadak, ha’u-nia orasaun no ha’u-nia servisu depende husi sirkunstánsia sira ka husi fuan ida ne’ebé metin iha Na’i? Se ita persevera – Jezús fó hanoin mai ita – ita la oha buat ida atu ta’uk, iha akontesimentu triste no aat sira moris nian mós, basá ita harii metin iha di’ak. Dostoevskij hakerek: «Imi keta ta’uk ema sira nia salan, imi hadomi ema ho nia salan mós, atu lalenok domin Maromak nian ne’e mak tutun domin nian iha rai» (I fratelli Karamazov, II,6,3g). Perseveransa mak lalenok Maromak nia domin iha mundu, basá Maromak nia domin mak domin fiél, perseverante, nunka muda.
Atu Na’i-Feto, Na’i nia atan ne’ebé persevera iha orasaun (kf Apóst 1,12), habiit ita-nia konstánsia.
