Agostinha Magno & Zelia Matos
Laga, 01 de Junho de 2023
Ksolok mak fuan ne’ebe livre no hatene hadomi. Loron festa Nasional labarik sira nian,labarik sira internato Beata Laura Vicuña Laga, selebra sira nia loron ne’e ho Jogos animados ne’ebe prepara husi grupu Assosisaun Anjo da Guarda (labarik kiik sira). Sira nia Jogos ne’e ho ninia titulu ‘SERBISU HAMUTUK’ No Jogos ida ne’e, kiik oan sira mak anima grupu assosisaun boot sira. Partisipantes sira haksolok liu hodi partisipa iha Jogos tanba alin kiik sira mak anima sira ho entuziasmu boot, tan ne’e festa simples ne’e sai furak liu tanba hotu-hotu partisipa ho ksolok.
Mensajen husi madre Domingas da Costa ba labarik sira iha sira nia loron festa ne’e:” Parabens no Agradese wain ba grupu Anjo sira ne’ebe anima ona Jogos ho entuziasmu boot, ne’e hatudu katak imi mos hatene lidera no hatene anima maluk sira seluk. Hau apresia tebes imi hotu nia ksolok no kolaborasaun hodi selebrasaun festa kriansa nian ne’e ho diak tebes. ” Ho festa ida ne’e tulun sira atu haboot liu tan sira nia ‘AUTO-KONFIANSA NO ATEN-BRANI ATU LIDERA’. Festa remata ho fahe premio ba manan nain sira iha konkursu hotu ne’ebe realiza tiha ona iha fulan Maio. Ida ne’e halo sira kontente liu tan tanba hotu-hotu hetan premio. Ikus liu labarik sira mos haksolok no agradese ba merenda ne’ebe simu nudar providensia husi benfeitor balun ba festa ida ne’e.
