Baucau – Komunidade edukativa FMA Baucau, halibur hamutuk iha loron 30 Dezembru atu halo programasaun lokál ba tinan 2014. Iha enkontru ne’e partisipa leiga sira ne’ebé tuir programasaun iha Dili iha loron 8 Dezembru 2013 hanesan Lizete, Fabiana, Domingas Pereira, Simoa, Domingas, Liliana no leiga na’in rua seluk ne’ebé la tuir Carlota no Domingas (zeladora sentru St. António).
Haka’as an atu envolve leigu barak no zeladora sentru sira ne’ebé pertense ba parókia tanba tinan oin mak tinan família nian nune’e mós tanba iha programasaun inspetoriál, iha objetivu 3 kona-ba ahi iha fuan (relasaun ho Maromak), liafuan iha ibun (karizma) no matan profétiku (misaun) FMA no Komunidade Edukativa sira iha asembleia tau atividade ne’ebé sei hala’o ho família no ba família.
Iha enkontru bazeia ba livriñu programasaun inspetoriál, komunidade edukativa hametin vizaun “sai movimentu boot ida nakonu ho laran-manas Da mihi animas cetera tolle, hodi evanjeliza no eduka iha komuñaun no ba komuñaun tuir espiritualidade Sistema Preventivu nian” (prog.p.6).
Molok programa irmán Jacinta Gusmão fó hanoin kona-ba Amu-Papa Francisco nia Ezortasaun Apostólika Evangelii Gaudium ne’ebé husu atu Igreja sai ba li’ur (saida misionária n.20-24) hodi to’o ba ema sira iha ninin. Iha Evangelli Gaudium Papa Francisco mós husu atu sai evanjelizadór/a sira ho Espíritu, ho impulsu misionáriu foun katak “evanjelizasaun ida ho Espíritu Santu, tanba nia mak Igreja evangelizadora nia klamar” (n.261), evanjelizadór’a ne’ebé “reza no serbisu” (n.262).
Ba tinan oin komunidade edukativa sei sai bá li’ur atu hasoru família sira durante tinan tomak. Sira sei hahú iha fulan Janeiru nia klaran ho sentru S. António. Sentru ida-idak iha sub-sentru ho númeru família entre 15-20. Ho katekista no zeladora sira irmán, leigu adultu, foin-sa’e no labarik sira sei la’o hamutuk la’ós de’it atu koñese família sira, sai solidáriu ba sira, maibé mós atu lori Liafoun Di’ak, prezensa ida orasaun no ksolok nian. Atividade ne’e sei hala’o iha tinan tomak; bainhira remata ona vizita sub-sentru ida, komunidade edukativa sei tuur hamutuk atu avalia molok hakat ba oin.
Buat seluk ne’ebé komunidade edukativa sei buka halo di’ak no envolve mak atividade oratóriu no grupu Infánsia Misionária parokiál. Pároku Kreda S. António kontente ba inisiativa ne’e no fó korajen atu hahú, enkuantu nia mós sei bolu responsavel sira sentru hotu nian atu halibur hodi haree atividade sira ba Tinan Família nian.
