Baucau – Vizita kanónika, tuir artigu Konstituisaun 147 FMA nian iha objetivu atu “promove komuñaun iha espíritu família, fidelidade ba konstituisaun no laran manas ba obra apostólika sira”. Nune’e mak komunidade S. Teresa d’Avila haksolok hamutuk ho oratorianu, grupu Infánsia Misionária, grupu Madre Mazzarello no membru sira komunidade edukativa, ohin 22 Abríl fó benvinda ba Ir Paola Battagliola, provinsiál, ne’ebé hahú ninia vizita kanónika. Labarik sira hananu no hatudu dansa kulturál, haksolok bele hasoru malu ho madre boot. Iha sira-nia liafuan benvinda nian labarik sira hateten katak madre Paola nia prezensa “sai roman ksolok nian mai ami hotu, liuliu halibur ami sai família ida de’it”, moris iha espíritu família nian.
Madre Paola ko’alia ba sira hodi agradese ba sira nia prezensa hodi fó surpreza benvinda nian ba sira. Nia foti oportunidade ne’e atu kumprimenta sira Boas Festas Páscoa nian no husu sira atu hato’o mós ba sira-nia família iha uma. Nia mós dehan ba sira katak nia hatene sei iha festa ida hamutuk iha loron 25, festa Páskua no festa Gratidaun ba Madre Jerál. Simu tiha rebusadu, hotu-hotu tama iha uma no balun iha kapela laran atu entrega madre Paola nia vizita ba Na’i-Feto.
Hafoin madre Paola no irmán sira nune’e mós membru tolu reprezenta komunidade edukativa nian, halo merenda hamutuk.
Iha tuku neen nia hasoru irmán sira komunidade nian hodi loke ninia vizita hodi fó hanoin kona-ba signifikadu vizita kanónika nian hanesan haktuir iha Konstituisaun no mós nu’udar Maromak rasik nia vizita, Maromak moris nia pasajen iha ita-nia moris pesoál no komunitária ne’ebé husu konversaun no raronak.
Irmán Paola sei hela iha komunidade to’o loron 26 Abríl 2014.
