Baucau – Labarik sira Infánsia Misionária no oratorianu FMA Baucau halo esperiénsia amizade ho oratorianu FMA Dewake nian, iha domingu 6 Jullu 2014. Iha loraik tomak labarik besik sira halo jogu football mane no feto, jogu halai taru karón no berlinde, jogu pasa-bola. Bele haree ksolok boot ba labarik no adolexente atus rua resin be partisipa husi sentru rua hotu, aleinde ksolok populasaun Dewake nia ksolok ba animasaun ne’e.
Atividade sira-ne’e nia objetivu mak tulun labarik sira iha sira-nia dezenvolvimentu umanu. Ita hatene katak ema mak ema ida iha relasaun, moris husi relasaun, moris ba relasaun. Relasaun mak konstitui ema nu’udar ema. Ema iha relasaun ho an rasik, ho ninia família, ho seksu seluk, ho belun sira, ho grupu no ho sosiedade nia hola parte bá, sosiedade dook no lahanesan.
Ema mós dezenvolve an no sai buras tanba relasaun. Relasaun mós sai fundamentu ba ita-nia sosiedade. Husi indivíduu sira nia relasaun ba malu mak halo sosiedade eziste; ema hatene katak nia labele moris mesak, katak nia presiza ema seluk, presiza sai ida ho ema seluk, “pertense” ba ema ruma ne’ebé iha kbiit atu fó moris no nia rasik hetan seguransa no protesaun. Iha sosiedade mak ema hetan espasu atu buras nu’udar ema, atu sai husi ninia família, hodi ba hasoru diversu husi an rasik no haburas identidade pesoál. Maski relasaun família nian mak baze ba kreximentu, maibé ema presiza sai husi família rasik atu loke an ba relasaun seluk, relasaun amizade nian, hola-parte ba grupu ida, fundamentál atu ema iha ninia konfrontu ho diversidade no diferensa bele hariku malu iha resiprosidade no komplementaridade. Nune’e relasaun sai mós knaar no responsabilidade.
Tanba relasaun interpesoál valór ida, ema presiza kualifika ninia relasaun sira liuliu afetiva, komunikativa, partisipativa importante ba ninia kreximentu.
Atensaun atu eduka ba relasaun mak halo irmán no animadór/a sira, iha sira-nia formasaun no akompañamentu ba labarik no adolexente sira, fó atensaun tebes atu sira aprende oinsá sai belun no simu diversidade. Iha desportu sira aprende atu simu manán no lakon, atu la provoka malu ho liafuan no hahalok sira ne’ebé bele hamosu konflitu.
Jogu remata ho merenda ne’ebé animadór/a Dewake nian prepara, hafoin labarik sira fila ba uma. Maski sira tenke la’o de’it husi Vila Antiga Baucau to’o Dewake ba-mai, maibé sira-nia esperiénsia ksolok hamutuk nian halo sira entuziazmu no la sente kolen.
