Roma – Husi loron 13-15 Outubru dadeer, Kapitulár Filhas de Maria Auxiliadora (Salesianas de Dom Bosco) sira reflete, partilla no diskute kona-ba dezafiu, mudansa no hilin sira hasoru kultura komunikasaun nian (núkleu datoluk). Entre dezafiu sira ne’ebé evidensia mak nesesidade ba relasionamentu profundu no la’ós superfisiál, auténtiku, simples, franku no valorizasaun silénsiu nian nu’udar parte integrante komunikasaun nian. Faktu katak, ohin loron iha dezenvolvimentu maka’as social network nian, hatudu katak ema sente solidaun boot no presiza komunika, maski komunika ho modu dijitál. Rede sosiál sai “pátiu foun” hasoru malu nian. Ba FMA sira, tanba joven nia mundu mak ida dijitál, presiza iha formasaun atu komprende kultura komunikasaun nia impaktu ba realidade, ba estilu moris nian hodi bele eduka an no eduka foin-sa’e sira ba uzu krítiku no responsavel, no hodi uza fatin dijitál nu’udar fatin evanjelizasaun nian.
Ita-nia Fundadór no Fundadora valoriza komunikasaun no meiu hotu ne’ebé fasilita ba edukasaun no evanjelizasaun, tan ne’e, konvite atu kontinua prosesu edukomunikasaun nian, hodi formula itineráriu formativu konkretu kona-ba kultura komunikasaun no edukomunikasaun nian (formasaun permanente no inisiál), liuliu atu iha komprensaun boot liután kona-ba linguajen juveníl.
Durante diskusaun iha asembliea mosu hanoin barak… Iha preokupasaun atu ita-nia hilin sira sai hilin pobreza nian. Hilin probeza no sobriedade nian mak konsekuénsia ita-nia resposta ba Jezús. Mosu kestaun se FMA ida-idak presiza duni iha komputadór rasik, modelu ikus telefone nian… Presiza iha dixernimentu komún, hili orentasaun komún, tanba dalaruma iha komunidade mak mosu dezigualdade sira, maski ita hatene katak, tan knaar ruma, irmán ida presiza iha instrumentu sira.
Irmán balu subliña velosidade media sira nian, nune’e mosu nesesidade atu iha tempu hakmatek nian, silénsiu nian, rona nian, partilla nian, atu haburas relasaun interpesoál.
Nune’e entre hilin sira propoin husi komisaun oioin, mai nesesidade formasaun kualifikada ba irmán ruma, leigu, joven, atu sai prezente iha social network nu’udar lian profétiku, propozitiva anúnsiu no denúnisa nian hodi defende kiak sira nia direitu no serbisu ba dame; hatene horik iha espasu virtuál sira ne’ebé teknolojia oferese atu sai prezensa ne’ebé rona, enkoraja, komunika no evanjeliza. Aleinde ne’e, kria rede solidariedade nian atu evita ezkluzaun dijitál, atu hamenus dezigualdade oportunidade nian, iha fatin ne’ebé susar asesu ba komunikasaun.
Iha finál diskusaun nian Madre Yvonne Reungoat hateten katak, bele haree sensibilidade boot iha ita hotu katak “kultura komunikasaun mak elementu importante ba ita, ne’ebé presiza kontinua hake’an liuhusi hakle’an ita-nia vida konsagrada no ita-nia profesia”. Nia mós salienta katak edukasaun-evanjelizasaun-komunikasaun mak dadu karizmátiku ida. “Don Bosco mak ema ida apaixonadu ba komunikasaun tanba nia apaixonadu ba edukasaun hodi uza meiu sira nia tempu nian atu bele to’o ba joven sira ho modu populár no ho konteúdu”, Madre Yvonne subliña. “Hahú husi paixaun edukativa no apostólika mak ita sei hetan dalan, tanba se la iha laran-manas ita para iha difikuldade sira no difikuldade sira sempre iha. Institutu ida hanesan ita-nian la bele la husik atu dimensaun ne’e la kona nia”. No ida-ne’e presiza reflesaun boot. Muda linguajen mak buat ida maibé muda linguajen sai linguajen profétiku no la adekua de’it ba sekularizmu, konsumizmu, husu preparasaun kulturál. Nune’e, “ita presiza orientasaun sira atu keta husik korrente mai husi invazaun media nian lori ita”, konklui La Madre.
Hotu tiha diskusaun iha asembleia núkleu datoluk nian, Kapitulár sira kontinua ho reflesaun ba núkleu dahaat kona-ba pergunta “Tanba sá mak ho formasaun hotu ne’ebé ita simu ita-nia moris la nakfilak?”
