Baucau – Gratidaun mak espresaun fuan nian ne’ebé hatene haraik-an hodi rekoñese buat kmanek ne’ebé simu no esperimenta husi ema, akontesimentu no esperiénsia sira iha moris loron-loron nian.
Ho sentidu ida ne’e ohin ho ksolok boot nu’udar Família Saleziana hamutuk ho oratorianu sira husi Diwake, Teulale, grupu Infância missionária, grupu Mazzarello, Laura Vicuña, Antigas Alunas, no reprezentante ADMA, espresa sira-nia gratidaun ba Don Bosco iha ninia Bisentenáriu moris nian hamutuk ho Irmán Alma Castagna, provinsiál FMA nian. Okaziaun ne’e sai mós momentu gratidaun nian ba Ir Alma nia prezensa iha komunidade edukativa nia leet.
Festa gratidaun nian hahú hodi simu Me. Alma ho kántiku no dansa husi grupu hotu ne’ebé prezente, hafoin kontinua ho orasaun. Depoizde orasaun iha liafuan abertura nian husi Irmán Jacinta Gusmão. Ir Jacinta aprezenta Irmán Alma nu’udar inspetora foun ba inspetoria TIN tanba labarik barak mak seidauk koñese nia. Hafoin kontinua kedas ho aprezentasaun kona-ba Don-Bosco nia moris: primeiru husi oratóriu Diwake ne’ebé aprezenta oinsá Mamá Margarida akompaña Don Bosco iha nia vida espirituál (primera komuñaun), kontinua kedas ho grupu Mazzarello ne’ebé aprezenta oinsa Don Bosco nia amizade ho nia belun sira; depoizde ida-ne’e kontinua ho grupu Infância missionária ne’ebé ho knananuk, dansa no drama aprezenta Don Bosco no sociedade de alegria; oratóriu Teulale aprezenta Don Bosco nia misaun, oinsá hahú oratóriu no enfrenta difikuldade sira. Dramatizasaun hirak ne’e iha ligasaun ba malu hodi aprezenta Don Bosco nia moris no nia misaun. Labarik hotu aprezenta ho entuziasmu, ksolok no espontaneidade. Haree katak sira ho hakas-an tomak interioriza duni Don Bosco nia moris liuhusi sira-nia aprezentasaun. Grupu Antigas alunas mós iha reprezentante na’in 
tolu ne’ebé hato’o knananuk Madre Mazzarello nian, nu’udar omenajen ba ko-fundadora (ho Don Bosco) Institutu FMA iha 5 Agostu 1872. Grupu ADMA fali nia reprezentante mak ADMA juniora na’in tolu hato’oo knananuk ba Maria.
Hotu tiha aprezentasaun Madre Alma fó nia mensajen ikus nian ba labarik sira katak buat hotu ne’ebé ita halo ho objetivu ida katak atu fó ksolok ba Maromak, ba ita nia maluk sira no mós ba ita ida-idak nia an. Nia agradese mós ba labarik sira ne’ebé ho entuziasmu dramatiza Don Bosco nia moris no nia misaun, hodi dehan katak “grupu ida-diak mak pedasu ida puzzle ida-nian atu kompleta Don Bosco nia ilas”. La to’o deit atu aprezenta Don Bosco nia moris maibé liuliu atu imita ninia virtude sira no nia laran manas apostóliku.
Dala ida tan obrigada madre Alma ba ita nia prezensa iha ami leet. Ami laiha buat ida atu fó maibé ami-nia haka’as-an loron-loron atu sai di’ak mak nu’udar prezenta furak ida ne’ebé ami fó ba madre ami mós sei kontinua reza ba madre no inspetoria nia intensaun tomak. Ita sei hamutuk nafatin iha orasaun. OBRIGADA….OBRIGADA… OBRIGADA… BA BUAT HOTU NO BOAS FESTAS BA BISENTENÁRIU DON-BOSCO NIAN…! (Albina do Carmo)
