Dili – Loron 27 fulan Novembru, iha Dili eskola Maria Auxiliadora Comoro, aluno sira husi VI ano no IX, hala’o festa agradesementu nian hamutuk ho professores no madre sira ne’ebé akompaña sira durante tinan 3, no balun tinan 6, nune’e molok atu foti ain husi eskola Maria Auxiliadora sira hakarak espresa sira nia fuan gratidaun nian hodi agradese Professores no madre sira ho atividade sira ne’ebé sira prepara mak hanesan orasaun hamutuk, lia menon husi madre, professores no reprezentante aluno sira. Mensajen badak husi madre Sebastiana : ” Boaviajen ba aluno sira, “ Good Luck, Good Look” haree buat ne’ebé diak iha moris, liuliu iha amizade no lori ba oin valores hotu ne’ebé imi simu no hetan iha eskola Maria Auxiliadora, lia menon husi Madre Paulina mak parabens, obrigado no boaviajen lori imi nia-an nu’udar estudante ne’ebé diak, buat ne’ebé imi aprende kona ba disiplina no buat diak hotu ne’ebé imi hetan keta tauk atu haklaken iha ambient foun ne’ebé imi sei ba hasoru.
Programa festa agradesementu ida ne’e hahu iha tuku 10.00 no remata ho han meiudia hamutuk. Ho tempu hanesan madre sira fahe mos prezente ba sira ida-idak, kamisola ne’ebé hakerek kona ba labarik sira nia direitu. Aluno finalista balun mos hakarak hato’o sira nia agradesementu no fahe sira nia esperiensia ka ideia ruma;
- Ha’u nia naran Egisia Freitas, tinan 15, nu’udar finalist a IX ano, tinan 2018; Ha’u hakarak agradese ba eskola tanba liu husi eskola ida ne’e ami simu matenek barak husi professores no madre sira ne’ebé eduka no akompaña ha’u, liu-liu tulun ami atu sai labarik ne’ebé diak, onesto, pasiensia, fahe domin ba malu, hatene halo sakrifisiu no hatene respeita ema seluk, ba ha’u nia parte ha’u lahatene atu rekompensa saida ba esperiensia sira ne’e hotu, maibe ha’u promote katak, ha’u sei lori valor diak hotu ne’ebé ha’u simu no hetan iha eskola ida ne’e, ba aplika iha eskola seluk ne’ebé ha’u sei ba no mos iha ha’u nia moris tomak.
- Ha’u nia naran Julieta Soares, tinan 15 ha’u eskola iha Maria Auxiliadora hahu kedas husi Pre-Eskolar to’o tinan ida ne’e, nune’e ba ha’u, ha’u sente eskola ida ne’e hanesan ha’u nia uma no ha’u lakohi atu husik, se karik madre sira aumenta tan ensinu Sekundario karik ami hotu sei kontente tebes, razaun tanba iha ambiente madre Salesiana ami sente familiar no besik no livre liu ho professores no madre sira. Tempu hanesan ha’u hakarak agradese uluknanain ba inan doben Maria Auxiliadora ne’ebé nafatin proteje ha’u,agradese ba madre, professores, trabalhadores hotu iha fatin ida ne’e, husi sira ida-idak nia dedikasaun, pasiensia,matenek, tempu no domin mak ohin loron ha’u bele hamrik metin atu kontinua ha’u nia estudu ba fatin seluk ,dala ida tan ho liafuan mamuk maybe ho domin boot, ha’u dehan deit Obrigado wain..
- Husi Novita Agatha Viqri Alves; ha’u nia gratidaun ba eskola Maria Auxiliadora ba professores, madre sira, durante tinan 8 ha’u aprende buat barak, pontu ne’ebé interesante liu ba ha’u nia esperiensia mak edukasaun ida ne’ebé tulun ha’u atu sai labarik ne’ebé firme hodi hamriik metin ba buat diak, sai ema ne’ebé independente hodi la depende demais ba kolega seluk ka aman inan, nune’e esperiensia furak ne’e hotu sei sai nu’udar memoria ne’ebé ha’u lakohi atu haluha, la’os deit ida ne’e esperiensia seluk ne’ebé kona tebes ha’u mak, aleinde simu edukasaun, madre sira mos lori ami atu koñese mos santidade salesiana Don Bosco, Madre Mazzarello, Laura Vicunha no Domingos Savio sira nia moris, nune’e ho esperiensia hirak ne’e hotu ami sei rai no lori nu’udar bukae ba ami nia jornada edukasaun nian. Obrigada wain
- Ha’u nia naran Lizzie Freitas, tinan 12, finalist VI ano, ha’u sei kontinua eskola fali iha Kasait. Ha’u mos hakarak agradese ba madre, professores no ema hotu ne’ebé tulun ha’u durante ha’u nia estudo iha eskola Maria Auxiliadora, ba ha’u esperiensia furak liu mak , ha’u bele koñese no hatene santu, santa salesiana hanesan DB, MM, Laura Vicunha, Domingos Savio sira nia moris, no mos ha’u hatene atu loke no lee evanjellu, liuliu mak iha sábadu madre sira sempre fahe evanjellu domingo nian, nune’e ida ne’e hanesan naroman ida mai ha’u wainhira fila uma aprende atu loke no lee mesak no iha domingo ha’u bele hatene ona kona ba evanjellu, nomos ponto seluk mak halo ha’u atu koñese liu tan Jesus husi Ninia liafuan no hanorin.
Obrigada, husi Finalista Eskola Maria Auxiliadora, Comoro, Dili
