Diocese Maliana.
“Ha’u mak ne’e, haruka ha’u ba!(Is. 6:8) “ho profeta Isaias nia lia hatan ba Na’i nia bolu ne’e mak Papa Francisco foti hodi hahu’u ninia mensajen ba domingo mundial missaun nian ba tinan 2020 ne’e. Tan ne’e mak diocese Maliana ho koordenasaun no aprovasaun bispu diocese maliana D. Norberto do Amaral nian,diocese maliana deside atu selebra domingo mundial missaun nian ne’e ho aktividade “akampamentu misionária ba labarik no adolescente sira ba dahuluk ne’ebe realiza iha loron 23-25 outubru 2020 iha eis-kodim Maliana ho tema “Moris mak Missaun. Ha’u mak ne’e, haruka ha’u ba”. Iha akividade ne’e partisipa husi OPIAM husi parokia hotu iha diocese Maliana, maizumenus labarik no adolesente 500 resin ne’ebe fahe ba knua lima: knua Belem, knua Nazare, knua Jeruzalem, knua Betania no knua Galilea tuir parokia no estasaun misionária sira.
Loron dahuluk ba aktividade ne’e la realiza tuir programa tanba udan bo’ot nune’e hahu de’it ho orasaun abertura no aprezentasaun programa ba loron tolu ne’e. Iha loron daruak depoizde santa misa iha oras tuku 8:30 Amu Bispu D. Norberto fo konferensia ba OPIAM sira ho tema “vokasaun misionária labarik no adolescente”, iha konferensia ne’e Bispu dehan katak ema hotu ne’ebe simu ona batizmu simu knaar atu sai nuudar misionária lililiu iha hahalok no liafuan. No konferensia daruak husi ir. Francelina Freitas Fdcc ho tema “historia no espiritualidade labarik no adolescente misionária”. Hafoin iha konkorensia drama Bibliku husi parokia no estasaun misionária idaidak, tersu misionáriu no remata ho kalan kultural. Iha loron ikus akampamentu ne’e kontinua knua idaidak halo prosesaun ba parokia hodi reza tersu tuir dalan ba kontinente 5 
no mos ba pandemia corona virus no taka ho selebrasaun eukaristika ne’ebe preside husi bispu diocese de Maliana D. Norberto do Amaral. Iha umila Bispu repete ba OPIAM sira katak imi mak misionária kiik sira, sai misionária domin nian iha imi nia familia ho liafuan no hahalok.
Iha akampamentu misionária ne’e labarik no adolescente partesipa ho ksolok no hodi hakarak atu hamanas liu tan sira nia espiritualidade katak orasaun, esmola, sakrifisiu no sasin iha moris lorloron.
(Josefa Ricarda FMA)
