Dili, Balide loron 4 fulan desembru tinan 2024. Nu’udar loron graduasaun ba estudante nain 52 (mane 14 no feto 38) ne’ebe hala’o ona sira nia formasaun durante tinan ida nia laran. Serimonia graduasaun hetan partisipasaun husi Instituisaun sira ne’ebe uluk simu sira hala’o sira nia esperiensia servisu nian.
Me. Evangelina Xavier, FMA ne’ebe sai mos nu’udar diretora jeral ba CFSC, iha nia diskursu hateten ba graduadu sira atu uza didiak abilidade professional no formasaun sira ne’ebè sira hetan ona iha CFSC nu’udar bukae ida atu hasoru mundu servisu nian, sai sarani diak no sidadaun laran mo’os iha fatin ne’ebe deit sira ba. Iha okaziaun ne’e Senhor Fernando nu’udar reprezentante inan-aman agradese tebes ba Irman sira, formadora sira, instituisaun sira no parte hotu ne’ebe kolabora ona ba sira nia formasaun to’o momentu ida ne’e sira bele gradua no simu sertifikadu.
Liu husi oportunidade ida ne’e iha mos estudante graduada, Dezia Pereira ne’ebé espressa ninia ksolok gratidaun nian, katak CFSC ba nia hanesan familia ida ne’ebé simu nia, hatutan katak formasaun sira ne’ebe nia simu tulun tebes nia iha mundu serbisu nian liliu tulun nia atu sai joven madura iha ninia jornada moris nian. Nia kontente tebes tan bele hetan oportunidade atu mai aprende iha CFSC. Ho ksolok boot nia hato’o mos sentimentu gratidaun profundo ba dedikasaun hotu ne’ebe formadores sira fo ona no ho seguridade nia dehan katak iha duni transformasaun ka passu kiik diak ne’ebe akontese ba nia moris.
Serimonia graduasaun remata ho almosu konfraternizasaun hamutuk ho familia sira ne’ebe prezente. Parabens ba graduadu sira hotu no bom susesu ba imi hotu.
