Husi Roma (Italia). Vigária Jerál Institutu Filhas de Maria Auxiliadora, Irmán María del Rosario García Ribas, haruka surat ida ba Provinsiál sira, ba Superiór sira Vizitadória nian, no FMA hotu no Komunidade Edukativa sira Instituto FMA nian ne’ebé prezente iha kontinente 5, hodi partilla tema Festa Gratidaun 2025 nian, ho ninia indikasaun sira ba preparasaun no realizasaun.
Festa ida ne’e sei selebra iha Inspetoria Maria Auxiliadora Vietnam (VTN), iha loron 26 fulan-Abril tinan 2025 ho tema:
“Halakan Evanjellu Esperansa nian”
Motivasaun tansa espresa nune’e:
“Iha klima sagradu tinan Jubileu nian, ba ita koinside ho inísiu preparasaun ba Aniversáriu ba dala 150 partensa misionária dahuluk FMA nian, ita hakarak moris ho kle’an Santa Maria Mazzarello nia liafuan sira: «Tempu to’o ona atu halakan hikas ahi», ahi Evanjellu nian, misaun nian, esperansa nian no mos ahi gratidaun nian. Iha klima ida-ne’e, haroman husi Maromak nia Liafuan: “Kristu Jezús ita-nia esperansa” (1 Tim 1,1), ita selebra Festa Gratidaun tinan 2025 nian”.
Elementu signifikativu balun ne’ebè forma Logo Festa nian:
Globo: Sírkulu azul-escuro reprezenta Rai, uma komún umanidade nian, iha-ne’ebé ema fó no simu domin no kura.
Mapa Vietnam nian, rai iha-ne’ebé fini karizma Salezianu ne’ebè kuda husi misionáriu dahuluk sira no buras nafatin.
Tambor bronze hanesan símbolu sagradu ba kultura, arte no istória nasionál, iha armonia ho kultura sira seluk iha mundu.
Imajen Maria Auxiliadora nian nu’udar Inan Esperansa nian, ho mantu ampia, nakonu ho domin inan nian, nakloke nafatin atu akompaña, hadomi, proteje no apoia nia oan ida-idak iha mundu tomak.
Ankora no krús: Vida kristaun bele sai sólidu se wainhira ninia ankora mak iha Kristu, hun esperansa nian. Nu’udar konvite ida ba ema hotu atu tau konfiansa totál iha Maromak no reflete kompromisu atu habelar roman Evanjellu nian.
Logo nia klaran ne’e halo hosi ahi no joven sira. Fiél ba idaidak nia vokasaun, akompaña husi Maria no iha komuñaun ho Instituto, ho FMA ida-idak ne’ebè sai “Monumentu moris agradesimentu nian” ho entuziazmu atu fó haklaken Kristu ba ema hotu, liuliu ba foin-sa’e sira.
Iha preparasaun ba eventu ida ne’e, Inspetoria Vietnam propoin itineráriu semana haat nian: Jezús Kristu – fonte esperansa nian; Peregrinu sira Esperansa nian; Sasin sira esperansa nian ba mundu; Halakan Evanjellu Esperansa nian.
Iha surat sira ba inspetoria ida-idak sei iha indikasaun sira kona-ba “sinál esperansa nian” atu fahe nu’udar Inspetoria/Vizitadoria, kona-ba jestu solidariedade nian ne’ebé propoin husi Inspetoria VTN, no kona-ba programa jerál Festa nian.
Vigária termina ninia karta hodi agradese Inspetoria Maria Auxiliadora Vietnam nian ba sira-nia disponibilidade no Inspetóra/Superióra sira Visitadoria nian ba sira-nia kompromisu iha preparasaun no dezeju sira:
“Festa Agradesementu mundiál ida ne’e kontinua hametin ita-nia unidade ho Madre, halo nia sente ita-nia afetu no gratidaun nu’udar FMA no nu’udar komunidade edukante sira.
Festa agradesementu tinan ida-ne’e hetan kór espesiál hodi hein kanonizasaun Beata Maria Troncatti nian. Hanesan Madre hateten mai ita iha ninia Sirkulár 1046: “Ida-ne’e ba ita hotu tempu ida grasa espesiál nian, bolun ida atu hafoun ita-nia an nu’udar Instituto atu kontinua, ho aten-barani no ksolok, dalan santidade nian ne’ebé ohin Maromak husu ita atu la’o tuir.”
