FMA no novisia nain 18 representa FMA hotu Inspetoria TIN nian, agradese hodi hananu musika gratidaun nian ba Mgr. Marco Sprizzi, ne’ebè remata ona ninia misaun iha Kreda Timor nian.
Iha inkontru ida ne’e, irman sira sente tebes klima familiar, espontanea hodi fahe ba malu ksolok no esperiensia, apresia buat diak hotu ne’ebè sira sente no sira nota husi Don Marco ninia misaun iha Rai Timor. Molok atu komprementa monsignor irman Julia hato’o liafuan agradesementu nian tuir mai irman nia liafuan agradese nian:
“hakarak agradese tebes ba ita-boot nia tempu. Ami husi Kongregasaun Filhas de Maria Auxiliadora, Inspetoria Timor Indonesia, hakarak hato’o ami-nia apresiasaun no agradesimentu kle’an ba oportunidade atu koñese ita-boot no ba ita-boot nia dedikasaun no empeñu, ne’ebé konsege fahe ho fuan no sabedoria iha sinodalidade ho ema hotu. Ita nia prezensa signifikativu tebes mai ami, iha eventu hotu-hotu Kreda nian, Estadu Timór nian no mai ami Saleziana sira. Ami agradese liuliu ba monsignor nia vontade atu partisipa iha eventu sira iha uma Saleziana no ba esperiensia vizita Santu Padre nian, ne’e ba ami Timor oan nu’udar momentu ida ne’ebé sei hela ba nafatin iha ami-nia fuan. Ami mós hakarak hato’o ami-nia agradesimentu ba ita-boot nia laran-di’ak no ba sasin fiar no amizade nian ne’ebé ita oferese ona ba povu timor no mai ami FMA sira.
Ami entrega ita-boot nia misaun foun iha Na’i nia liman, ho serteza katak Nia sei nunka abandona ita-boot no katak nia sei kontinua la’o iha ita-boot nia sorin, hodi orienta no proteje ita-boot nia ain-hakat sira. Na’i-Feto Maria Auxiliadora sei tau matan nafatin ba Ita-boot, atu ita bele sai Don Bosco nia oan di’ak, kapaz atu hadomi liután Ninia Kreda no ninia umanidade.”
Wainhira Nia rona tiha mensajen ne’e nia nakonu ho matabeen no komosa. Depois de kanto monsignor mos hato’o ninia mensajen ba irman sira, tuir mai ninia mensajen:
“Mons. Marco Sprizzi representate Santa Se, iha Timor leste nia diskursu ba FMA iha dia 28 .02.2025 iha Nunciatura Motael. Imi hatene katak hau nia nomina husi Vaticano publika ofisialmente iha observasaun Romana iha loron dia 31 Janeiro iha festa Don Bosco nian. Sekretaris Vaticano Parolin husu hau atu wainhira mak fo aviso? Hau hatan ba nia katak bele publika iha dia 31 janeiru atu kontinua iha Don Bosco nia protesaun. hau la konsege aviza iha Fatumaka iha Festa Don Bosco nian neba, tamba ita nia orario sedu liu molok Italia bele komunika. Nune’e hau nonok deit, pois liu tiha tuku 8 iha Italia mak hau telefone hodi komunika ba amo Bispu no ba Presidente. Maibe iha Fatumaka loron ne’eba sai ba hau hanesan peregrinasaun ba ha’u. Tebes imi nia liafuan ne’ebe espresa ha’u komosa tebes, obrigado ba buat ne’ebe imi dehan mai hau, obrigada tan imi sente ha’u nia domin ba imi, ida ne’e ha’u koko halo ho ema hotu, ita mesak la bele halo buat ida, tebes ha’u konsege halo buat hotu ne’ebe husu ba ha’u tamba bele hamutuk ho imi husi Kreda, husi governo, religioso, no povo Timor. Obrigada barak, ha’u aprende buat barak iha ne’e. hanesan buat ne’ebe imi kanta “servo per amore” domin mak halo buat hotu. Ha’u nia fuan nakonu ho domin, obrigada barak ba buat hotu ne’ebe imi halo ba ha’u, to’o imi nia vizita iha oras ida ne’e, maske ha’u okupadu hotu troka bebeik orario maibe imi pasensia tebes ho ha’u. Ita sei kontiua hasoru malu iha momento seluk, karik imi ba estuda iha Roma, ka ba eventu jubileu, hanesan horseik don Virgilio Cardeal hateten iha video katak Timor nia pesaduk ki’ik ida iha Vaticano. Pasti Timor iha ha’u nia fuan, maske ha’u sei la hatais Tais hanesan agora ha’u hatais ne’e. nune’e obrigada barak tebes ba imi, ha’u fiar katak Don Bosco sei kontinua akompanha ha’u hanesan nia halo ona ho hau iha misaun iha Timor.
Maromak fo bensaun ba imi, no Maromak halo imi diak kontinua sai Maromak nia presenza domin ema hotu no liuliu ba foinsa’e sira tuir Karizma Salesiano. Ha’u kontra oituan tamba Salesiano hotu hanoin katak ha’u sei sai Salesiano tamba hau moris iha ambiente Salesiano. Maske nune’e ha’u hateten Karizma importante liu, tamba Karizma mak presente Espiritu Santo nian. Presente ida ne’e ida-idak bele sente iha nia fuan. Vokasaun Salesiano, laos deit tamba hadomi Salesiano maibe sente presente Espiritu Santo ne’e iha nia fuan. Hau sente vokasaun sai sacerdote, atu buat hotu mak Nai nian deit, nudar s. Joao Paulo II “Totus Tuus Maria”. Buat hotu mak Nai.
Maibe hanesan dotor sira ne’ebe jeral no iha dotor sira spesialidade nian. Dotor jeral hatene moras hotu-hotu iha ema nia isin, maibe ida espesialidade nia hatene moras ida-idak. Ha’u mak dotor jeral ne’ebe serbi ba hotu. Espesialidade sira ne’e mak hanesan karisma oinoin iha Kreda, ha’u la sente sai dotor espesialidade maibe sai dotor ba moras hotu. Maibe la dehan katak ha’u la hadomi joven, ha’u hadomi joven sira Don Bosco nian, dalabarak ha’u hasoru foinsa’e sira hanoin ho sira mak joven sira ne’ebe Don Bosco hadomi, nune’e halo ha’u hare sira no hadomi sira, nu’udar buat ne’ebe ha’u aprende husi uma Saleziana.
Ha’u husu imi nafatin ho tenereza, ternura, sai laran kmaus ba joven sira, liuliu imi ne’ebe feto imi iha kapasidade ba ida ne’e, keta haluha sai ternura ho joven sira ho fuan feto nian. hau haraik bensa ba imi ida-idak hodi S. Joao Bosco, Madre Mazzarello, S. Callisto no Maria Auxiliadora nia harohan daet”.
Ikus nian taka ho foto hamutuk no don Marco Sprizzi, nia apresia tebes FMA sira nia presenza nu’udar familia ida ne’ebe hatudu sentidu gratidaun ba nia. Nia dehan hau sei viajen iha loron mundial ba feto sira iha dia 8 marzo 2025.
Obrigado barak e boa viajen.
Sr. Julia Fernandes,FMA
