Hahu loron 28 fulan fevereiro to’o loron 03 fulan Marsu tinan 2025, irman FMA sira iha comunidade Sta. Maria Mazzarello Venilale, hamutuk ho Komunidade edukativa no ho estudante sira, ho laran haksolok simu Madre Provincial- TIN, Madre Evangelina da Costa Xavier FMA iha comunidade refere. Espresaun ksolok nian ida ne’e hato’o liu husi dansa tradisional Timor nian, husi estudante sira rasik.
Objetivu ba visita ne’e, Madre provinsial rasik hato’o iha introdusaun katak:”Inspetora prontu atu rona irman ida-idak, no konese liu tan realidade komunidade nian.” Madre hatutan tan: ita nia komunidade sira tenki sai komunidade peregrino esperansa nian no liuliu projeta ita nia-an ho esperansa hodi husik Espirito- Santo koalia mai ita no halo ita sai sasin ba fraternidade. Tulun integral ba foinsa’e sira hodi haburas espirito familia iha nebe edukasaun saleziana sai hahalok ida esperansa nian. Madre provincial hasoru direita mos ADMA sira, estudante sira no mos professor sira. Enkontro ho professor sira, Madre provincial koalia liu kona-ba LIDERANSA. Oinsa sai lideransa diak hodi guia no orienta foinsa’e sira ba dalan santidade nian, liuliu tulun sira sai protagonista iha futuru tuir estilo Saleziana nian. Ba estudante sira mos Madre relata oituan streia Reitor- Maior nian, hodi enkoraja sira atu sai foinsa’e hirak nebe nakonu ho esperansa no liuliu deskobre katak esperansa nee mak Maromak.
Momento ikus visita nian, nudar familia ida taka momentu importante ne’e ho missa solene, nebe diriji husi Padre Carlos SDB. Iha ninia omilia padre hateten: Ema ne’ebe hatene agradese ema hirak ne’e mak sei hetan ksolok lolos. Agradese ba Maromak ba prezensa Madre provincial nian iha komunidade ida ne’e, padre hatutan tan: imi deskobre Maromak ninia protesaun ba imi liu husi ema seluk nia prezensa, husi madre sira no professor sira ne’ebe dedika an tomak hodi serbi imi. Tamba ne’e foinsa’e sira keta haluha agradese nafatin ba Maromak ba buat diak hotu ne’ebe imi hetan loron-loron.
Madre Provincial ninia mensajen ikus:”uluk knanain hau agradese ba Maromak ba ninia domin ne’ebe halibur ita hamutuk, ba imi foinsa’e sira hau agradese wain, liuliu ba imi nia hamnasa midar serena no ba imi nia enpenu diak sira. Labele lakon esperansa, tau laran metin nafatin iha Maromak, aproveita didiak oportunidade sira hodi aprende valor diak sira oi-oin hodi haburas imi nia kapasidade intelektual no espiritual nian.”
Irman Agostinha Magno
