Roma – FMA Kapitulár sira iha semana ne’e serbisu kona-ba proposta sira husi Inspetoria ba Kapítulu Jerál no modifikasaun artigu sira Regulamentu nian ho ninia votasaun. Hafoin haree mós serbisu Redasaun ba “Actos do Capítulo Geral XXIII” ne’ebé entrega ba Komisaun Redasaun nian. Modalidade serbisu nian baibain halo ho aprezentasaun husi komisaun responsavel, reflesaun pesoál no partilla iha grupu komisaun oioin.
Atu hahú serbisu ohin nian kona-ba redasaun “Actos” nian, Madre Yvonne Reungoat iha ninia liafuan abertura, lori Irmán Kapitulár sira atu hateke ba Beata Maria Romero, ne’ebé iha tinan ne’e ita hanoin tanba iha fulan Outubru marka aniversáriu da-75 ne’ebé nia forma grupu “las misioneritas” (menina misionária sira).
Hanesan ita hatene, iha epizódiu ida ne’ebé halo Beata Maria Romero hanoin no buka dalan oinsá tulun ema kiak sira. Iha loron ida fila fali ba komunidade husi eskola ho udan boot, irmán ne’ebé simu nia dehan nune’e: “Ha’u gosta udan, nune’e ita bele toba di’ak”. Ema kiak ida ne’ebé hein hela atu simu buat ruma dehan ba sira: “Ba imi di’ak tanba imi iha kakuluk ida di’ak atu toba. Imi mai haree ha’u nia fatin, iha ne’ebé bee tama iha fatin hotu… nune’e la hatene se imi sei dehan liafuan hanesan”. Liafuan sira ne’e sai surik ida sona borus irmán Maria Romero nia fuan, no hahú hanoin ema kiak sira iha Costa Rica, oinsá tulun sira. To’o momentu ne’e nia hala’o nia knaar di’ak iha eskola, oratóriu, múzika/koru, katekeze… Maibé enkuantu halo atividade sira ne’e, husi momentu ne’e nia hahú loke matan, tilun atu buka dalan. Madre Romero, liuhusi ninia aluna ida ne’ebé fahe kona-ba bairru kiak liu ida ho nesesidade baze hotu, ho oan barak maibé kbiit la iha, liuhusi menina seluk ne’e mós hateten katak iha ema ateu sira ne’ebé tama uma sai uma iha bairru ne’e atu haburas ódiu no vingansa, maibé la halo buat ida atu tulun sira, lori preokupasuan no nesesidade ema kiak sira ne’e nian iha ninia fuan laran. Situasaun ne’e hamosu iha Maria Romero inisiativa atu tulun sira, ne’ebé menina sira rasik mak haree, loke dalan. Husi ne’e mak mosu desizaun atu forma las misioneritas. Iha Outubru 1939 to’o tempu novena Imakulada nian, Maria Romero hahú preparasaun ba foin-sa’e sira-ne’e. Metodolojia simples de’it: bazeia ba la’ós ba kualidade pesoál, maibé ba kbiit orasaun nian. Madre Yvonne ho emosaun hanoin oinsá ho orasaun “Pon tu mano Madre mía, ponla antes que la mía”, nia haruka foin-sa’e feto sira ne’e ba misaun iha loron 25 Dezembru 1939.
Ba Madre Yvonne, halo memória Madre Romero nian iha momentu ne’e fó hanoin katak tema Kapítulu Jerál nian la’ós buat ida foun: Evanjeliza ho foin-sa’e sira la’ós buat ruma foun. Maibé hodi “husik ema sira ne’ebé presiza liu horik iha ita-nia fuan no buka atu forma ema sira atu bá, basá ita labele halo buat hotu”, mak ita bele halo buat barak. Dalabarak ita para tanba ita la iha forsa. “Iha forsa barak iha mundu”, Madre salienta, “presiza de’it hetan kanál sira, estratéjia ida, deside atu forma joven sira atu sira bá iha fatin ita labele to’o bá”.
Karakterístika seluk ne’ebé Madre Yvonne destaka husi Beata Maria Romero ne’ebé iha kapasidade atu halo buat barak mak “halo buat hotu iha obedénsia”. Nia ema mehidór ida, ho ideia barak, maibé se diretora dehan katak “lae” nia para. Nia buka halo Maromak nia hakaran, no “se buat ne’e Maromak nia hakaran, buat ne’e sei bá oin, no se la’ós husi Maromak sei sai buat ruma pesoál ne’ebé sei la iha fekundudade”. Nune’e, Madre Jerál nia insisténsia mak atu “kontinua fó fuan ba karizma ne’ebé iha nia laran iha kbiit vitalidade nian”. Buat ne’ebé importante la’ós hateke ba foho ne’ebé iha ita-nia oin maibé hateke ba ba ain-hakat ne’ebé ita bele halo, hafoin ain-hakat seluk no neineik-neineik fokit sai foho ho fiar.
“Madre Maria Romero moris ho espiritualidade boot, feto ida ne’ebé loos duni moris místika-profesia nian, unidade vokasionál, ne’ebé nakfilak sosiedade. Nia la hela de’it iha Kreda, maski nia iha konfiansa boot ba Maria Ausiliadora no pasa tempu iha orasaun. Maibé ne’e hotu atu harii mundu ida di’ak liután no ho foin-sa’e sira no ho ema sira ne’ebé kiak liu”.
Atu iha okaziaun tinan 75 formasaun “las misioneritas nian”, FMA hotu iha mundu bele iha Madre Maria Romero nia kualidade ne’e no fó entuziazmu ba foin-sa’e sira atu servisu ba ema ne’ebé kiak liu, hodi haburas fiar, ksolok. Halo ida-ne’e ita hala’o pastorál vokasionál.
