Venilale, loron 13 fulan Maio tinan 2025, iha comunidade FMA comunidade rua, hamutuk ho estudante sira –nia inan-aman, professor sira, antigo aluno Etv, halibur hamutuk iha eskola refere hodi festeja ho solene Santa Maria Domingas Mazzarello nian. Festa ne’e hahu kedas ho palestra intensivu ida ho tema : TALITA KUM nebe apresenta husi Madre Fabiola, FMA. Tema nebe madre lori sai hanesan lisaun nebe tulun duni inan-aman sira oinsa bele kuida sira nia oan rasik iha tempo ohin loron nian. Aleinde tema ne’e iha mos sesaun daruak formasaun nian, ho tema Peregrinos da Esperansa tema jubileo 2025 nian, tema interresante ne’e hato’o husi professor Fernando. Orador hateten;”ita nudar peregrino sira nebe la’o ba Nai nia uma, prezisa buat essensial rua, vontade no pasensia, buat rua ne’e bele lori ita ba esperansa nebe ita la hare ho matan.”
Festa solene ne’e hahu mos ho missa Eukaristia nebe preside husi Padre Aquino Dias SDB, iha paroquia sagrado coração de Jesus Venilale. Iha ninia omilia nia konta klean oituan konaba Madre Mazzarello nia moris, nia haktuir”Madre Mazzarello ninia haraik –an no simplesidade kuda esperansa ida nebe la bosok, ohin loron ita hare direita, FMA hakonu iha nasaun barak iha mundo. Madre Mazzarello serbisu hamutuk ho Don Bosco ba motivo espesial ida, mak obra ida nebe pertense tomak ba Maria hodi tau matan ba foinsa’e sira liu husi edukasaun integral.”
Remata tiha missa kontinua kedas ho eventu espesial INAGURASAUN MAZZARELLO RESTAURANTE foun. Madre Carolina Maria Correia diretora comunidade MM rasik hato’o kronolojia fatin restaurante refere ne’e ba inan-aman sira hotu. Madre Provinsial Madre Evangelina da Costa Xavier, FMA, hato’o ninia lia menon: “Hau hakarak hato’o agradese wain ba professores sira hotu nebe ho laran luak teb-tebes kolabora ho madre FMA sira iha edukasaun integral foinsa’e feto no mane sira. kontente ho restaurante ne’e tanba bele tulun sira nia oan sira iha pratika”. Hafoin han meiodia hamutuk ho hare aprezentasaun oi-oin husi estudante etv sira, hodi halo festa ne’e sai furak liu tan.
Sr. Agostinha Magno, FMA
