Dili – Comoro, 17/05/2025, hala’o abertura ba festival oratorio ba tinan 2025 ho tema “Loke odamatan esperansa nian”, programa ida ne’e hala’o ho objetivu atu hametin virtude esperansa no hodi fo esperansa ba labarik no foinsae sira, nu’udar momento festa ho labarik no foinsae no fahe ksolok no talento hodi valorize no promove.
Ba loron dahuluk festival oratorio nian ne’e hahu ho expo kona ba espedisaun missionaria dahuluk FMA nian ba iha Argentina. Programa ne’ebe hala’o iha festival ida ne’e mak :
- Visita expo esperansa no misionaria FMA dahuluk.
- kompetisaun sertame “Katekese jubileu” (labarik oratoriano)
- kompetisaun pinta kanvas ba foinsa’e sira.
- Diskurso esperansa nian ba foinsa’e sira
- Orasaun Taize
- Kompetisaun hinu jubileu no dansa jubilee ba labarik
- Santa misa
- Kompetisaun pinta ba labarik
- Kompetisaun coro no solo Jubileu ba foinsa’e sira.
Oratorio sira ne’ebe partisipa iha kompetisaun sertame ba labarik oratorianu/a sira husi Tasi-tolu, Don Bosco Balide, OPIAM, no oratorianu Maria Auxiliadora. Iha certame ne’e perguntas sira koalia kona ba tinan jubileu esperansa nian, tempu Kuaresma, tempu Paskua, no Santu Padre Papa Francisco nia vizita apostolika iha Timor. Hafoin tuir kedas ho liafuan abertura no boatarde husi Madre Provincial Timor Indonesia, Madre Evangelina da Costa Xavier FMA, iha madre nia boatarde ba labarik no foinsae sira madre koalia mos kona ba tinan jubileu esperansa nian. “esperansa ne’ebe la bosok”. Ita mak peregrinu sira esperansa nian, atu sai peregrinu esperansa nian, ita presiza tau konfiansa tomak iha Maromak, tamba Maromak mak ita nia esperansa loloos. Hotu tiha boatarde husi madre provincial iha aprezentasaun sasin sira esperansa nian husi missionaria dahuluk FMA iha terra dell fuego, ne’ebe aprezenta husi, ir. juniores, novicias, postulante no menina sira husi komunidade Divina Providenza. Iha mos sasin santu/a Saleziana sira nian, Don Bosco, Madre Mazzarello, Laura Vicuña no Domingos Savio.
Iha kompetisaun diskursu ba foinsa’e sira kona ba esperansa. Iha diskursu ne’e laos deit ba foinsae sira husi ambiente Saleziana nian, maibe mos ba foinsae sira husi ambiente seluk. Iha diskursu ne’e, maske topiku ne’ebe sira hotu lori hanesan, no hot-hotu koalia kona ba esperansa ba foinsae sira, maibe sira hotu dezenvolve topiku ne’e ho sira nia matenek rasik no mai aprezenta ho diak tebes, tuir ida-idak nia maneira, kreatividade no tuir ida-idak nia kapasidade. Hotu tiha diskursu han kalan no reza orasaun Taize “Kristu foinsae sira nia esperansa”.
Iha loron daruak Festival Oratorio nian, simu tan foinsa’e no labarik oratorianu sira ne’ebe hakarak partisipa atu asiste no fahe ksolok hamutuk iha festival ne’e, nune’e bele dehan oratoriano sira ne’ebe marka prezensa iha festival ne’e hamutuk 400 pessoas, ne’ebe mai husi sentru oratorio FMA ne’ebe eziste iha Zona Dili nian, inklui mos grupo balun ne’ebe laos hola parte ba oratorio FMA nian. Ba loron domingu 18-05-2025, atividade ne’ebe hala’o mak iha kompetisaun dansa no hinu festival Oratotriu nian husi labarik oratorianu/a sira. Molok tama ba atividade sira seluk, iha selebrasaun Eukaristica ne’ebe preside husi Padre Rolando SDB. Iha padre nia omilia, Padre dehan ba labarik no foinsae sira katak; “ita tenke sai hanesan Saun Paulo ne’ebe ho laran manas lao ba rai sira seluk hodi fo sasin kona ba Jesus no nia haksolok baihira ema fo terus ba nia tan Jesus nia naran. Ita sira ne’e mos tenke halo hanesan ne’e, maibe la signifika katak sai sarani ita terus deit, maibe ita tenke terus bainhira iha terus. Jesus hanorin ita atu hadomi malu hanesan Nia rasik hadomi ita”.Hafoin de selebrasaun Eukaristia, iha kompetisaun pinta ba labarik no foin sa’e sira no kompetisaun kanta Coro no solista hinu Jubileu nian, husi grupu oi-oin.
Husi atividades hotu ne’ebe halo iha festival oratorio ne’e, tulun labarik no foinsa’e sira atu atu espresa sira nia talentu ne’ebe sira iha no tulun sira atu haburas liu tan talentus ne’ebe mak sira ida-idak iha.
Labarik oratorianu ida husi oratorio Don Bosco Balide ho naran Aprilio fo sasin katak, “ nia sente haksolok tebes tamba liu husi festival oratoriu ne’e nia bele partisipa iha kompetisaun pinta no nia hetan terseiru lugar, maske nia pinta deit ho lapis no la tau kor, maibe nia hetan terseiru lugar, no bele espresa ninia talentu pinta nian ne’ebe nia iha.
Reprezentante foinsae ida husi grupu desportu ba Moris Timor-Leste. Nia fo sasin katak nia sente haksolok tebes tamba ho festival oratorio ida ne’e. Tamba loke ba labarik no foinsae sira hotu atu promove sira ida-idak nia talentu, nia mos dehan katak sussesu nunka mosu mesak maibe liu husi prossesu ida no tenke promove. Foinsae ne’e fo sasin katak nia laos husi ambiente Saleziana, nia mai husi ambiente seluk, maibe nia bele mai partisipa iha eventu ida ne’e, nia mos dehan katak nia sente diferente maibe hanesan familiar tebes. Nia admira tebes ho labarik, foinsa’e, madre no irman sira ne’ebe ativa tebes.
Postulante
Bele hetan foto seluk iha link: https://www.flickr.com/photos/201546617@N05/albums/72177720326230515/
