Hahú loron 24 to’o loron 28 fulan Maiu tinan 2025, Irmán sira iha Komunidade Beata Madalena Morano Fuiloro hamutuk ho menina sira simu madre Provincial TIN, madre Evangelina da Costa Xavier,FMA ho ksolok no domin boot halo vizita iha Komunidade. Irmán hamutuk no menina sira hotu hola parte iha dansa tradisional ne’e. Objetivu husi vizita ne’e, madre provincial hato’o iha ninia abertura vizita kanonika nian ne’e mak : madre provincial pronto atu rona no buka atu promove komuñaun entre Irmán sira iha Komunidade, hatene no koñese liutan realidade moris komunidade nian. Madre hatutan tan katak: irmán sira sai komunidade peregrinu esperansa nian hamutuk ho foinsa’e sira, iha tempu hanesan, integra moris ho foinsa’e sira liu husi komprimisu hamutuk no responsabilidade karismatika nian.
Madre Provincial hasoru direita Antigas alunas sira, Kolaborador sira koalia konaba LIDERANSA. Oinsa Antiga aluna no kolaborador sira sai lideransa ne’ebé di’ak hodi tulun, akompaña, rona no tau matan ba ema hirak ne’ebé sira hasoru iha sira nia misaun. Hanesan Dom Bosco no Madre Mazzarello hala’o iha Valdocco no Mornese tulun labarik no foinsa’e sira ne’e ba moris santidade. Nune’e madre provincial husu antigas alunas no kolaborador sira atu aprende nafatin husi Don Bosco no Madre Mazzarello estilu Sistema Preventivu nian hodi tulun mos foinsa’e no labarik sira ne’ebe sira hasoru ba dalan Santidade nian.
Bainhira madre provincial vizita oratorio Sentru, madre hato’o ba oratorianu no asosiasaun sira konaba natureza oratorio nian mak: fatin Igreja, eskola no fatin halimar nian hodi konvida labarik no foinsa’e sira atu aprende no badinas liutan iha atividade oratorio nian. Ba OPIAM sira madre hato’o ba sira labarik sira mak esperansa ohin nian, atu hari Nasaun ida di’ak no forte presiza labarik sira ne’ebé hanoin no mehi ba futuru ne’ebé di’ak no tau laran metin iha Maromak nu’udar esperansa ba futuru. Iha kalan boanoite ho menina sira madre provincial rekomenda ba menina sira atu sai foinsa’e sira esperansa nian, airin rua importante liu ne’ebé Dom Bosco husik hela mak “Eukaristia no Konfesa” sai hanesan dalan ida atu to’o ba moris Santidade nian.
Iha vizita ikus nian Komunidade hatudu ninia domin no gratidaun liu husi Misa Solene ne’ebé preside husi Padre José de Sa, SDB. Iha Padre nia omelia Padre ko’alia konaba madre provincial nia vizita hanesan Nain Feto ne’ebé ba halo vizita ba nia prima santa Isabel. Iha ne’ebé Madre provincial nia prezensa sai hanesan inan ida ne’ebé atu rona tulun, tau matan no akompaña Irmán no foinsa’e sira ne’ebé madre hasoru iha loron hirak ne’e nia laran. Iha kaln menina no Irmán sira kumprimenta madre liu husi kanta no dansa furak sira nu’udar gratidaun ba madre ninia ksolok, domin, simplesidade laran di’ak hodi rona no tau matan mai ami iha loron hirak ne’e nia laran.
Mensajen ikus husi madre Provincial mak : “Ha’u hato’o agradese wain ba imi nia akollensa hodi fó bemvinda mai ha’u liu husi dansa tradisional. Ha’u agradese Irmán sira ida-idak ne’ebé ho sira nia espontaniedade, domin, ksolok no laran metin resiproku hodi fahe sira nia esperiensia moris nian ne’ebé sira hala’o iha misaun ho responsabilidade tomak no ho pasiensia, ha’u agradese mós bai mi foinsa’e sira ne’ebé hatudu imi nia ksolok, laran di’ak, espontanha, hamnasa midar no imi nia vontade di’ak sira atu aprende iha fatin ida ne’e hodi haburas liutan imi nia moris fiar nian no mos imi nia kapasidade atu aprende buat diak bai mi nia futuru nu’udar agricola no kursu. Dala ida tan ha’u agradese ba di’ak hotu ne’ebé imi halo ona mai ha’u. Maromak rekompensa di’ak hotu”.
Ir. Honoria dos Santos, FMA
