Fatumaca loron 15 fulan Juño tinan ne’e, Oratoriano sira husi Lia-oli, Waihaco, Waibua, Centro no Osso-Hulla, ne’ebe hamahan an iha paroquia Venilale nian, hala’o peregrinasaun atu manan Indulgensia nudar objetivu tinan grasa tinan jubileu nian. Nune’e oratoriano sira, inan-aman sira no animador sira la’o ho entuziasmu ho laran manas iha fiar, sira la’o husi gruta Maria Auxiliadora nian hodi akompana ho orasaun, rosario no hananu sira hodi la’o to’o iha santuario. To’o iha ne’eba hahu kedas ho Sakramentu Rekonsiliasaun no mos Sakramentu Eucaristia ne’ebe diriji husi Padre Isaias Bonifacio SDB (Diretor Casa Fatumaca), iha ninia omilia nia hateten: Ita nia la’o dalan sira ninia objetivu mak atu to’o iha Maromak. Ohin ita selebra festa boot ita nia fiar nian, SANTISSIMA TRINDADE, Maromak ida deit ema nain tolu ket-ketak no iha knaar oi-oin maibe Na’i ida deit. Santissima Trindade mak ezemplu unidade perfeita ne’ebe nakonu domin, Iha nebe Aman criador Oan salvador no Espirito Santo Santificador. Padre fo parabens no agradese ba Oratoriano sira Venilale nian nebe hala’o peregrinasaun iha fatin refere. Depois de han meudia oratoriano sira hala’o jogo amizade kontra oratoriano sira husi fatumaka. Remata jogo molok fahe malu, Padre Diretor SDB Fatumaka hato’o hela lia menon ba peregrinantes sira hotu. Nia hateten: Hau apresia tebes ho imi nia prezensa iha loron ohin, hein katak imi haksolok , hau agradese ba inan-aman sira nebe kolabora iha missaun hodi haburas liu tan iha atividade oratorio iha centro sira. Padre husu ba oratoriano sira atu sira tenki sente oratorio nudar: Uma, parokia, eskola no kampu.
Sr. Agostinha Magno FMA
