Roma – Semana ikus Kapítulu Jerál nian ne’ebé hahú ohin, 10 Novembru 2014, dedika atu haree proposta ikus balun hato’o ba Kapítulu Jerál 23 husi Inspetoria sira no mós haree redasaun “Actos do Capítulo Geral 23”. Serbisu ida ne’ebé todan ba Komisaun Redasaun nian mak rekolle dezafiu sira, mudansa mentalidade no hilin sira mai husi estudu Instrumenu Serbisu nian, husi Relatóriu Tinan Neen, husi leigu no foin-sa’e sira nia lian.
Pontu sentrál tolu ne’ebé sintetiza dokumentu mak 1) Nakfilak an liuhusi enkontru; 2) Hamutuk ho foin-sa’e sira; 3) Sai misionária/u ksolok no esperansa nian. Husi ne’e mak mai liña asaun sira ne’ebé Asembleia Kapitulár identifka atu bele lori renovasaun vitál ba Institutu FMA hodi bele to’o ba objetivu “Sai ho foin-sa’e sira, uma ne’ebé evanjeliza”.
Iha kalan 10 Novembru, novisa sira husi novisiadu rua iha Roma, hamutuk na’in haatnulu, hato’o surpreza ida ba Kapitulár sira. Sira-nia “recital” ho títulu “Kapíutlu Jerál” nia leitmotiv mak pasajen bíblika Emaus nian ne’ebé uza iha Instrumentu serbisu nian ba KJ 23. Sira hahú aprezentasaun ho foin-sa’e sira-nia situasaun atuál, sira-nia hakilar, sira-nia nesesidade, solidaun…reprezenta país oioin mundu nian. Problema sira identifika mak problema feto sira enfrenta, imigrasaun, krize identidade… Iha sira-nia pobreza ezistensiál ne’e, enkontru ho irmán FMA sira ne’ebé ho sira-nia sasin no liafuan, lori sira ba enkontru ho Jezús, hamosu iha sira esperansa no moris foun.
Recital ne’e subliña katak Maromak tau matan ba foin-sa’e sira ne’ebé kiak liuhusi Don Bosco no Madre Mazzarello. Liuhusi Antiga Aluna Paola Staiano nia tulun ne’ebé hakerek recital ne’e no treinu sira, novisa sira-nia kolaborasaun iha kompozisaun múzika, dansa, nune’e mós irmán FMA sira, mosu obra ida furak no ksolok nian. Hanesan novisa sira rasik aprezenta molok hahú, sira-nia recital mak Kapítulu paralelu ida, tanba ninia konteúdu foti husi Instrumentu serbisu nian.
Madre Jerál Yvonne Reungoat komenta sira-nia aprezentasaun furak ne’e, dehan ba novisa sira katak sira mak “dokumentu kapitulár”basá sira interpreta didi’ak situasaun joven sira-nian, ne’ebé husu mudansa mentalidade no hilin sira ba FMA no komunidade edukativa tomak. Nia mós husu sira atu prepara an atu hamutuk abanbairua sai “uma ne’ebé evanjeliza ho foin-sa’e sira”.
