Madre, Chiara Cazzuola, no Konselleira Jerál sira Institutu Filhas de Maria Auxiliadora nian hato’o gratidaun ba tempu grasa nian ne’ebé esperimenta no aprezenta vizaun jerál kona-ba dalan prinsipál sira Institutu nian iha tinan 2026.
Tuir mai ita ba lee hamutuk sira nia lia menon:
Durante tempu Plenu nian, esperiénsia sira ne’ebé fahe iha parte oioin mundu nian hariku ami-nia diskusaun no dixernimentu komunitáriu, hametin ami-nia intensaun atu kontribui hodi jenera moris iha Institutu nia laran, iha fidelidade ba karizma no hodi hatán ba dezafiu sira realidade kontemporánea nian.
Ezersísiu Espirituál ne’ebé hala’o iha Zoverallo Verbania, sai nu’udar oportunidade boot ida ba rejenerasaun umana no espirituál ba ami hotu. Iha silénsiu, iha rona Liafuan no iha enkontru ho Jezús, ami hafoun ami-nia hakarak atu tuir Na’i ho fuan ne’ebé disponivel liután no laran-luak ba Ninia bolun sira. Ami nia agradesimentu kle’an ba Inspetoria Lombardia “Sagrada Família” (ILO) ba akollimentu fraternu, ba oportunidade atu vizita komunidade balun no ba enkontru ho irmán no foin-sa’e sira, ne’ebé ami hetan, Dala ida tan, sentidu pertense ba unidade Família ida husi karizma furak salezianu. Unidu iha Don Bosco no Madre Mazzarello nia espíritu, ami koko komuñaun nia furak, rona malu, no fahe dixernimentu, hodi deskobre fali katak fraternidade mak fundamentu servisu auténtiku hotu-hotu animasaun no governasaun nian. Ita laran metin katak Provinsiál foun sira fila fali ba sira-nia Inspetoria ho vizaun luan liután, fuan ne’ebé renovadu, iha paixaun ba misaun, no laran-manas atu fó sasin ho sira-nia moris katak autoridade iha estilu evanjéliku mak, liuliu, servisu konkretu ida domin gratuitu nian ne’ebé jenera moris.
Dalan revizaun nian ba Projetu Formativu no LOME
Durante Plenu, ami fahe pasu sira ne’ebé maka foti ona to’o agora iha prosesu revizaun no atualizasaun ba dokumentu sira “Projetu Formasaun – kuda abut iha Aliansa ” no “Atu Sira bele hetan moris no moris ne’ebe naresin. Linha orientativa misaun edukativa FMA nian (LOME).” Ami hasoru malu ho grupu rua ne’ebé, hamutuk ho Konselleira sira ba Formasaun no pastoral juvenil, sira elabora hela dokumentu rua ne’e.
Ba LOME, fahe sujestaun ikus liu ne’ebé simu no tau nia baze ba faze sira tuirmai aprovasaun no publikasaun testu nian. Grupu redasaun ba Projetu Formativu nian, husi nia parte, halibur sujestaun sira ne’ebé mosu husi diskusaun sira ho Madre no Konsellu Jerál, hodi uza nu’udar kriteriu orientamentu tuir mai.
Ami agradese ba serbisu ne’ebé halo ona to’o agora hodi integra kontribuisaun sira no mudansa neneik ne’ebé propoin, bazeia ba indikasaun ikus husi dokumentu ekleziál no atentu ba dezafiu sira ne’ebé formasaun no misaun edukativa aprezenta mai ami iha kontestu kompleksu no oioin ne’ebé ita moris ba. Mai ita haburas esperansa hodi aprezenta dokumentu rua ne’e durante Kapítulu Jerál XXV.
Misionária sira iha trasu karizma nian
Durante Plenu, ami halibur feedback kona-ba eventu oioin ne’ebé envolve Família Saleziana iha selebrasaun don nian, ne’ebé moris nafatin no oportunu, Don Bosco nia karizma. Entre sira-ne’e maka Kongresu Mundiál Kooperadór Salezianu sira-nian ba dala VI, ho tema “Sai Fermentu atu sai fekundu”, hodi marka aniversáriu ba dala 150 sira nia fundasaun nian. Partisipasaun husi ema maizumenus na’in 400—Kooperadór Salezianu sira, Delegadu Salezianu Don Bosco nian, no Delegadu Filhas de Maria Auxiliadora—husi Rejiaun 11 iha kontinente lima, fó sasin kona-ba oinsá ita-nia Fundadór nia mehi sai universál. Eventu ne’e esperimenta ho gratidaun no sentidu responsabilidade nian, iha koñesimentu katak karizma salezianu kontinua ko’alia ba mundu ohin loron liuhusi salezianu leigu sira-nia moris ne’ebé halo Jezús nia domin preveniente sai vizivel, liuliu ba foin-sa’e mane no feto sira ne’ebé vulneravel liu.
Hodi hasoru realidade ida-ne’e, ita labele hela pasivu deit, indiferente, no «laiha laran manas», maibé ita simu bolun atu lori ksolok no beleza Evanjellu nian ho aten brani misionária nian.
Prezente no Bolu ba Santidade Misionária
Kanonizasaun Irmán Maria Troncatti nian mak prezente boot ida husi Maromak no tempu hanesan, konvite ida ba ita atu hafoun ita-nia empeñu atu sai misionária iha fatin hotu-hotu, hodi foti inspirasaun husi paixaun ba Kristu no ba edukasaun ne’ebé hamanas maka’as iha nia fuan. Ita entrega ba nia Kapítulu Jerál 25 ne’ebé sei mai, atu ninia ezemplu bele kontinua dezafia ita-nia moris no foin-sa’e barak nian, iha modu oioin, atu bele hasoru nia.
Iha loron 24 Juñu liu ba, ita selebra tinan 75 kanonizasaun Santa Maria D. Mazzarello nian: oportunidade ida atu hafoun ita-nia konxiénsia katak santidade ne’ebé ita simu bolun koinside ho ksolok ne’ebé ema ida no buat ida labele hasai husi ita no sai ita-nia sasin dahuluk no auténtiku liu. Amu-Papa Francisco, iha ninia Ezortasaun Apostólika, subliña liuliu «estilu femininu santidade nian, indispensavel atu reflete Maromak nia santidade iha mundu ne’e» (Gaudete et Exsultate, n. 12). No ita, iha preparasaun ba Kapítulu Jerál XXV, hafoun ita-nia konxiénsia katak sai santu signifika «hamoris fali paixaun misionária karakterístika ita-nia identidade karizmátika nian» atu sai, «ho kbiit profétiku ita-nia karizma nian, misionária komuñaun nian hamutuk ho foin-sa’e sira».
Madre Mazzarello no irmán dahuluk sira enkarna, ho modu femininu, Sistema Preventivu ne’ebé Don Bosco hatutan ba Família Saleziana no moris nu’udar dalan ba santidade misionária. Prezente Sistema Preventivu nian mak karakterístika ita-nia vokasaun iha Kreda. Tanba ne’e mak ba ita nu’udar ita nia espiritualidade no métodu asaun pastorál nian (kf. C 7).
Sistema Preventivu, prezente ida ba futuru
Ami hakarak agradese ba Inspetoria hotu-hotu ba sira-nia kontribuisaun signifikativa ba projetu peskiza nian ne’ebé propoin iha preparasaun ba aniversáriu ba dala 150 “Tratadu kona-ba Sistema Preventivu” (1877), ne’ebé envolve mós leigu no foin-sa’e sira, ho objetivu atu fo hanoin filafali nu’udar prezente ida ba futuru. Fila fali ba núkleu orijinál karizma nian, ita sente dezafiu dame nian ohin loron urjente liu duké uluk, iha mundu ida ne’ebé marka ho tensaun, konflitu no polarizasaun. Sistema Preventivu hakarak eduka hanoin, fuan, vontade no hanorin katak dame harii, uluknanain, iha ita ida-idak nia fuan no iha kualidade relasaun nian. Loos duni, ida-ne’e maka armonia ho Maromak, ho an rasik, ho ema seluk no ho kriasaun, ne’ebe tradús ba respeitu resiproku, konfiansa, enkontru, no buka buat di’ak no fahe.
Loron balun molok 5 Agostu, aniversáriu fundasaun ita-nia Institutu nian, ba ita barak mak sei halo profisaun dahuluk, ita agradese Maria Auxiliadora ne’ebé tau matan mai ita no ita-nia komunidade sira. Atu nia halo ita sai atentu liután ba Jezús Nia Liafuan, kriativu no ksolok hodi halo buat ne’ebe maka Nia hateten mai ita.
Kumprimentus domin fraternu nian no reza ba imi ida-idak.
Castel Gandolfo, 24 Jullu 2026
Madre jeral no Irmán Konselleira sira
