Amu-Papa Leão XIV nomeia Irmán Elena Massimi, Filha de Maria Auxiliadora, nu’udar Sub-Sekretária ba Sekretaria Jerál Sínodu nian, no Padre Giacomo Costa, SJ, eis-Konsultór Sekretaria Jerál hanesan, nu’udar Sub-Sekretária.
Irmán Elena Massimi. Moris iha Roma iha 16 Juñu 1975, hetan Doutoramentu iha Teolojia Sagrada ho espesializasaun iha Teolojia Litúrjika-Pastorál husi Institutu Litúrjia Pastorál “S. Giustina” iha Padova, inkorpora iha Fakuldade Teolojia Pontifísiu Ateneu iha Santa Anselmo. Nia mak Profesora Liturjia no Teolojia Sakramentál iha Universidade Pontifísiu Saleziana iha Roma, Prezidente Asosiasaun Profesór no konsultora Liturjia nian no Diretora Múzika ba Liturjia iha ofisiu Litúrjiku Nasionál Konferénsia Episkopál Italiana.
Hodi simu ninia nomeasaun ho agradesimentu kle’an ba Santu Padre, madre hato’o ninia desideriu no kompromisu atu hala’o ninia servisu ho sensu responsabilidade, espíritu ekleziál, no konfiansa iha Na’i. Sentrál ba ninia reflesaun mak ligasaun entre liturjia no sinodalidade, iha konxiénsia katak Kreda nia «viajen hamutuk» mosu husi rona Maromak nia Liafuan no selebrasaun Eukaristia nian, fonte komuñaun ekleziál nian no valorizasaun ministériu no vokasaun oioin nian.
Konferénsia Episkopál Italiana espresa ninia satisfasaun ho notísia ida ne’e. Iha komunikadu, Sekretariadu Jerál CEI nian esprime ninia ksolok, hodi haktuir oinsá, durante ninia tinan sira servisu nian iha ofisiu Litúrjiku Nasionál, Irmán Elena kontribui ho signifikativu ba hasa’e inisiativa sira no perkursu formativo sira tanba ninia paixaun ba Evanjellu, ninia kompetensia sientífika, no ninia sensibilidade pastorál. CEI espresa ninia konfiansa katak ninia kontribuisaun sei haburas liután dalan sira partisipasaun no komuñaun nian iha Sekretaria Jerál Sínodu nia laran, hodi garante ninia vicinanza iha orasaun ba misaun ekleziál foun.
Bainhira rona notísia ida ne’e, Superiora Jerál Filhas de Maria Auxiliadora, Madre Chiara Cazzuola, hodi Institutu nia naran hato’o agradesimentu ba Santo Padre no hato’o votus parabens ba Sub-Sekretáriu foun:
“Ha’u agradese ba Santu Padre tanba tau nia konfiansa iha ami nia Institutu hodi hili Irmán Elena Massimi nu’udar Sub-Sekretária ba Sekretaria Jerál Sínodu nian, no ha’u dezeja ba Irmán Elena buat di’ak liu iha misaun foun ida-ne’e, atu nia kumpre ho fidelidade totál ba Kreda, ba Santu Padre no ho entuziazmu no kompeténsia ne’ebé karakteriza nia.”
Nomeasaun Irmán Elena Massimi nian mak rekoñesimentu signifikativu ba knaar ne’ebé karizma saleziana no karizma femininu oferese nafatin ba Kreda nia moris. Reprezenta mós sinál konkretu kona-ba valór ne’ebé kompetensia teolójika, sensibilidade pastorál, no esperiénsia litúrjika bele lori ba viajen sinodál Kreda universál nian.
Fonte: cgfmanet.org
