Lecidere/Dili – Iha loron 9 Outubru 2012 horisehik, Amu-Bispu Dioseze Dili nian, Dom Alberto Ricardo, konvoka superiora maiór ka delegada sira ba reuniaun ida fahe ba parte tolu, ho asuntu “pastorál juventude”, iha Paço Episcopal, Lecidere.
Iha enkontru ne’e, sira ne’ebé marka sira nia presenza mak: Bispu Ricardo, superiora no delegada sira ne’ebé reprezenta superiora.
Enkontru hahú ho bispu nia liafuan ba relijioza sira atu fó importánsia liután kona-ba vida konsagrada, tanba Maromak bolu ita atu serví, tanba ita hakarak tuir Jezús Kristu nia ain-fatin, sai relijioza ba Kreda tomak. Sai relijioza katak tenke sai santa tanba Maromak ne’ebé bolu ita Santu, sai testemuñu kona-ba Kristu no labele fó ezempiu ne’ebé a’at ka eskándalu ba povu. Nia hatutan tan Santu-Padre nia liafuan ba ita Timór-oan sira ne’ebé nu’udar relijioza/u: “Timór ki’ik maibé hetan grasa wain tanba iha relijioza/o barak”.
Enkontru kontinua ho aprezentasaun husi padre Ángelo no irmán Angelita Gomes FMA, husi departementu Juventude Katólika, vigararia episkopál re-evanjelizasuan, Dioseze Dili nian kona-ba “Planu no estratéjia departementu juventude katólika Diioseze Dili nian”. Hola-parte ba Dioseze Dili parókia 18 no kuaze-parókia 7.
Konfere iha okosmai ninia konteúdu aprezentasaun nian.
Finalidade DEJUKDDIL (departementu juventude katólika Dioseze Dili)
- Halibur no haburas komunikasaun entre joven katóliku, nu’udar individuu no grupu kategoriál iha vigararia, parokia Diocese Dili nian.
- Halo kaderizasaun no formasaun ne’ebé iha responsabilidade ba prosesu preparasaun jerasaun foun ne’ebé iha potensiál, kriativu, integridade iha espesialidade ne’ebé prepara an ba futuru Kreda no Nasaun.
- Fó aten brani ba foin-sa’e sira atu partisipa iha programa Re-Evanjelizasaun hodi kultiva espíritu rekonsiliasaun, iha ambiente edukativauatu sai ema foin-sa’e feto no mane loloos ba ema seluk.
Planu no estratéjia
DEJUKDDIL (departementu juventude katólika Dioseze Dili) hanesan órgaun máximu ba juventude ne’ebé hari ona liu husi kongresu juventude Dioseze Dili, tau matan ba formasaun no kapasitasaun juventude nian tuir estatutu DEJUKDIL nian.
Vizaun: Hari programa foin-sa’e nian hodi dezenvolve sira nia moris iha dimensaun hotu, atu foin-sa’e kompromete an hodi serbi komunidade di’ak liután.
Espiritualidade:Hakle’an pessoalmente Maromak Futar Lia, doutrina no dokumentu sira Kreda nian nu’udar dalan hodi kria relasaun intima ho KRISTU BIBI-ATAN DI’AK.
Divizaun sira:
- Divizaun Espirituál Re-Evanjelizasaun
- Divizaun Arte, Múzika no Kultura.
- Divizaun Sentru Treinamentu (DTC)
- Divizaun dezportu
- Divizaun karitativa
Padre Ángelo husu atu superiora sira bele haruka membru husi komunidade atu tulun iha formasaun ba foin-sa’e sira liuliu iha área evanjelizasaun nian ho estratéjia: formasaun bíblika, pastorál universitária,vida sakramentál, orasaun, counselling, solidariedade.
Parte datoluk enkontru nian, aprezentasaun kona-ba oratóriu DEJUKDDIL nian husi irmán Angelita Gomes FMA. Oratóriu ne’e hari’i tinan ne’e ho objetivu hanesan tuirmai ne’e:
- Halibur hamutuk foin-sa’e sira husi fatin oioin iha Dili laran hodi oferese ba sira formasaun sarani no umanu no atividade interese nian.
- Kria ambiente no fatin iha ne’ebé foin-sa’e barak bele hatene fahe, rona, halibur hamutuk no haksolok hamutuk hodi oferese valoór kristaun hodi sai bukae iha sira-nia moris abanbairua nian.
Atividade tuir interese nian maka:
- Kursu teatru
- Kursu dansa ballet no kultura
- Língua inglés, Portugés (volontáriu husi International school no União europea)
- Múzika (vokál, organ, bateria, gitar/viola, violino…)
- Halo sabaun lokál
