RV – Amu-Papa Francisco nia katekeze iha kuarta, 11 Marsu, iha Prasa S. Pedro, mak reflesaun kona-ba importánsia no papél katuas-ferik sira iha família laran.
Papa Francisco kontinua ninia katekeze semana kotu nian, bainhira ko’alia kona-ba realidade atuál katuas-ferik sira-nian, marka, dalabarak ho solidaun. Amu-Papa destaka grasa no misaun iha faze moris ne’e nian, ne’ebé husik ba joven sira sasin fidelidade nian.
Sosiedade iha tendénsia atu soe ema ho otas katuas-ferik, maibé Amu- Papa fó hanoin katak Maromak nunka soe. “Nia bolu ita atu tuir Nia iha idade hotu moris nian no iha idade katuas-ferik mós kontein grasa no misaun ida, vokasaun loos ida Na’i nian”.
Papa Francisco fó hanoin katak loron ema katuas-feriks ira nian tinan kotuk iha Prasa S. Pedro halibur avó-mane no feto husi mundu tomak. Iha okaziaun ne’e, nia destaka sasin fidelidade husi sira barak ne’ebé kaben ba tinan 50, 60 nia laran.
Hodi temi esperiénsia Simeaun no Ana, ne’ebé rekoñese Jezús iha kosok-oan ne’ebé aprezenta iha Templu, Papa, Francisco konvida katuas-ferik sira atu tuir sira-na’in rua nia ain-hakat, hodi sai “poeta orasaun nian”.
“Don boot ida ba Kreda mak orasaun avó no katuas-ferik sira-nian! (…) Injesaun boot ida sabedouria nian mós ba sosiedade umana tomak: liuliu ba ida ne’ebé okupada liu, preokupada liu, distraída liu”.
Nu’udar ezemplu, Santu Padre temi Papa Eméritu Bento XVI, ne’ebé hili atu pasa etapa ikus nia mori snian hodi dedika an ba orasaun no ba rona Maromak. “Avó-mane no avó-feto sira forma ‘koru permanente santuáriu espirituál boot ida, iha-ne’ebé orasaun súplika nian no knananuk hahí nian apoia komunidade ne’ebé serbisu no luta iha kampu moris nian”.
Amu-Papa Francisco taka reflesaun hodi hatudu ninia hakarak ba Kreda ida ne’ebé dezafia kultura soe nian ho ksolok hakohak foun ida entre joven no katuas-ferik sira. “Ida-ne’e mak ha’u husu ohin ba Na’i, hakohak ida-ne’e!”.
