Dame no ksolok husi Terra Santa
Irmán doben sira,
Ha’u hotu ona Ezersísiu espirituál loron 2 liubá iha Jezús nia rain hamutuk ho provinsiál na’in 6 husi PCI-Índia, no provinsiál na’in 8 husi CIAO (menus provinsiál HongKong nian) no Ir. Margaret Bentley provinsiál South Pasific nian. Salezianu ida padre Mario Guariento mak gia Ezersísiu sira, ema ida místika salezianamente no hatene gia ami ho ninia moris no ninia liafuan insizivu no vibrante ba enkontru ho Kristu!
Ohin, molok husik rai haluha-laek ida-ne’e, ha’u hakarak tau ha-u-nia an iha komuñaun ho imi ida-idak atu dehan ha’u-nia obrigada tanba akompaã ha’u iha momentu hotu ho imi-nia orasaun.
Irmán doben sira, imi mós tama hotu iha ha’u-nia fuan laran no lori durante ha’u-nia peregrinasaun. Iha fatin hotu ha’u para tempu kle’ur iha orasaun no hafoun ho imi hotu profisaun fiar nian iha Jezús no empeñu atu haklaken Nia ho konviksaun boot liután no ho autentisidade.
Ne’e prezente boot liu mai ha’u atu hahú Tinan Fiar nian iha Terra Santa tanba ain-hakat ida-idak ha’u halo sai hanesan hanoin ida atu solidifika ha’u-nia fiar no fó ba nia autentisidade, la’ós de’it iha nivel intelektuál maibé liuliu iha nivel “enkontru” esperiensiál no profundu ho Kristu.
Loron abertura Tinan Fiar nian ha’u iha hela “Gruta Ami Aman nian”. Ha’u fahe ho imi reflesaun badak ne’e be kona tebes ha’u.
Iha ne’e Jezús hanorin atu harohan Ami Aman. Ita dala barak no karik hanesan toman ida ne’ebé la husik atu komprende revelasaun boot ne’ebé Jezús halo ba ninia eskolante sira. Jezús mai husi Betánia, no kalan tiha ona no nia para atu harohan. Eskolante sira hatene oinsá Jezús harohan tanba sira dala barak haree nia harohan maibé husu oinsá Jezús harohan. Sá maka nia ko’alia hela, resita salmu sira karik? No eskolante sira nia lia-husun interesante tebes: Mestre “hanorin ami harohan”, la dehan hanorin orasaun sira mai ami. Ida-ne’e importante tebes basá dala barak ita hanoin katak harohan maka resita orasaun sira, salmu sira, orasaun konsagrasaun nian, nst… No Jezús hanorin atu harohan ho liafuan rua de’it: Ami Aman. Jezús revela iha momentu ida-ne’e segredu profundidade ninia fuan nian katak entrega ba ninia eskolante sira revelasaun boot liu ne’ebé it abele imajina no komprende, katak revela sé maka Maromak ne’ebé nia harohan bá no sé maka Maromak ita tenke harohan bá. Maibé katak sá harohan? Harohan katak tama iha komuñaun kle’an, iha unidade ho Maromak ne’e ne’eb´eiha oin ida, oin Aman nian. Tan ne’e ita buka imajina Jezús ne’ebé emerje iha kontemplasaun Aman nian ne’ebé husi Nia mai “Liafuan ne’ebé halo an ba mane” no husik Aman, no iha orasaun filafali ba Aman No Espíritu ho fuan ninia fuan, ho ninia moris tomak, ho nia an tomak iha intimidade diálogu kle’an ho Aman. No oinsá Aman ne’e nia oin?
Jezús troka tradisaun ebreu sira-nian. Ebreu ida nunka barani bolu Maromak nu’uada Abba Papá, maibé fó nafatin naran litúrjiku ida, naran ida dimensaun reál nian, na’in nian. Liuhusi liafuan ne’e, Jezús revela ba ninia eskolante sira sá loos ninia relasaun ho Maromak, katak relasaun ida oan nian iha família ida. Jezús hanorin eskolante sira atu harohan, katak atu tam aiha relasaun oan sira-nian ho Aman, tama iha família no estabelese horik-fatin no ksolok rasik iha família ne’e. Ida-ne’e maka segredu ninia espiritualidade nian ne’ebé nia entrega ba ninia eskolante sira. Husi momentu ida-ne’e eskolante sira tenke aprende atu harohan, katak tama iha relasaun íntima ho Aman.
Orasaun ne’ebé Jezús hanorin mak orasaun espirituál ida, katak, lori ba enkontru ho Aman, iha ninia hakohak, ho hakaran atu kaer kona Aman, sente Nia, husik Nia hakohak no hakohak Nia. Ida-ne’e maka Jezús hanorin mai ita.
Irmán doben sira, ita loroloron harohan orasaun simples ida-ne’e ho atitude místiku-espirituál no moris ninia signifikadu kle’an liu. Hodi moris de’it iha nivel esperiénsia orasaun simples ida-ne’e maka ita sei konsehe hatutan ho modu vitál ba foin-sa’e sira, baita-nia irmán sirakatak Maromak mak Aman, hadomi ita no hakarak ita-nia ksolok.
TINAN IDA HO EMPEÑU ATU BURAS BA BEIBEIK IHA FIAR IHA JEZÚS NAZARÉ.
Hakohak ba imi hotu no ita sei hasoru malu fali iha tempu badak!!! Ir. Paola
