RV – Iha katekeze kuarta 1 Abríl, Papa Francisco ko’’alia kona-ba Tríduu Paskál, tinan litúrjiku no moris sarani nia tutun aas liu.
Triduu hahú ho Loron Kinta Santa, ho selebrasaun Han-Kalan Ikuss, bainhira Jezús iha véspera ninia paixaun nian, instituiu Eukaristia. Iha selebrasaun ne’e, nia halo jestu fase ain nian, jestu ida, ne’ebé tuir Papa Francisco nia esplikasaun, esprime Kristu nia sentidu moris no paixaun nian, katak servisu ba Maromak no ba maluk sira.
Iha Sesta Santa, loron atu medita kona-ba mistériu Kristu nia mate nian, ho adorasaun krús nian. Papa Francisco esplika katak Eskritura tomak hetan ninia kumprimentu iha Jezús nia domin ne’ebé, nakfilak injustisa boot liu iha domin. No iha tinan atus ba atus mak ema sira feto no mane, fó sira-nia sasin moris nian no hatudu Kristu nia domin perfeitu.
“Hodi adora Krús, hodi hateke ba Jezús, mai ita hanoin kona-ba domin, kona-ba servisu, kona-ba ita-nia moris, kona-ba mártir sarani sira no mós halo di’ak mai ita atu hanoin ita-nia moris nia loron ikus. Ema ida la hatene bainhira mak sei akontese, maibé ita bele husu grasa atu bele dehan: Aman, ha’u halo buat hotu ne’ebé ha’u bele. Buat hotu halo tuir ona”.
Kona-ba Sábadu Santu, Papa Francisco destaka silénsiu, basá Kreda kontempla Kristu nia “toba dukur” iha rate liutiha funu krús nian. Loron ne’e mak loron identifikasaun nian ho Maria, ne’ebé hela mesa-mesak ho roman fiar lakan nian, hodi hein Jezús nia Resurreisaun , ne’ebé ita komemora iha Domingu Páskua nian.
“Fatuk terus nian rahun ona, hodi husik espasu ba esperansa. Ne’e mak mistériu boot Páskua nian! (…)Ita-nia moris la remata iha rate nia fatuk ida nia oin, ita-nia moris hakat liu ho esperansa iha Kristu ne’ebé moris hi’as husi rate ne’e. Nu’udar sarani sira, ita simu bolun atu sai sentinela rai-hun mutin nian”.
Papa Francisco taka katekeze ho konvite ida ba sarani sira: “Iha loron sira Tríduu Sagradu nian, ita keta limita an de’it atu selebra Na’i nia Paixaun, maibé ita tama iha mistériu laran. Ita halo sai ita-nian ninia sentimentu sira, ninia atitude sira. Nine’e, sei ita-nian mak Páskua ksolok ida”.
