Foin-sa’e sira kuaze hamutuk 130 ne’ebé ho entuziazmu tuir Kampu Marianu ho tema: Maria modelu Fiar nian. Ami-nia komunidade FMA Balide servisu hamutuk ho komisaun Juventude Dioseze Dili nian sai fasilitadora ba kampu marianu. Ami organiza loron ida nia laran atu sira bele koñese no hadomi Na’i-Feto, liuliu nu’udar modelu ba ita-nia fiar, iha tinan ne’ebé dedika ba Fiar.
Pesoalmente hau sente kontente haree oinsá foin-sa’e sira iha hakarak bo’ot atu aprende kona ba Na’i-Feto. Sira partisipa ho modu ativu, ita bele haree hahu husi rejistrasaun to’o remata ho Misa ne’ebé Amu-Bispu D. Alberto rasik prezide.
Kampu ne’e ami fahe ba momentu tolu: Orasaun abertura atu entrega Bíblia no estátua Na’i-Feto ba partisipante, momentu hakle’an kona ba Na’i-Feto tuir fatin ka rai, no momentu ikus mak mandatu misionáriu.
Oin sa ami organiza Kampu Marianu ida-ne’e?
Fahe tuir fatin Na’i-Feto nian hanesan Nazaré, iha ne’ebé reflete kona ba Anunsiasaun, Ain-Karim kona ba Magnificat; Belein, kona ba Jezús nia moris, Cana kona festa kaben no Jeruzalém Na’i-Feto iha Kruz hun. Partisipante sira fahe tuir fatin sira ne’e ho Padre no madre sira ne’ebé preparadu hodi tulun sira atu hakle’an signifikadu fatin sira ne’e no eventu Marianu ne’ebé akontese.
Iha dadersaan sira ida-idak hakle’an kona ba ida-idak nia fatin. Tuir amlulik sira ne’ebé akompaña foin-sa’e sira ne’e, dehan foin-sa’e sira ne’e hamrook ba buat sira ne’e, hamrook ba buat ruma espirituál, no partisipante sira rasik mós kontente tanba sira bele koñese diak liu tan kona ba Na’i-Feto no iha loraik halo mandatu missionariu husi grupu ida-idak hili misionáriu ida atu ba haklaken ba sira seluk, kona-ba buat ne’ebé sira deskobre iha sira-nia grupu, no Na’i-Feto nia atitude ne’ebé kona liu ba sira nia moris.
Ha’u haree momentu furak atu bele promove devosaun no domin ba Na’i-Feto liu husi atividade simples sira ne’e. Liuliu iha ita nia rain ita dehan iha devosaun boot ba Na’i-Feto, maibé agora dadaun ita ladún sente katak jerasaun foun kontinua devosaun ida-ne’e. Nune’e ida-ne’e dezafiu boot mai ita atu kontinua kuda devosaun iha sira.
Hau hakarak fahe uituan mós foin-sa’e sira nia esperiénsia depoizde Kampu Marianu, sira hotu hakbesik hodi espressa sira nia sentidu gratidaun no dehan esperiénsia ne’e furak no úniku liu ba sira, no sira husu atu kontinua basá sira dehan dala barak liu, sira ba tuir prosisaun, peregrinasaun maibé la iha ideia kle’an kona ba Na’i-Feto, hanesan agora dadaun sira aprende no kokko iha kampu Marianu ida ne’e. No iha avaliasaun ne’ebé ami husu sira atu halo, kuaze husi grupu oi-oin husu atu kontinua iha sira-nia parókia, no aumenta tempu atu bele hakle’an liután.
