Editoriál: Sínodu hotu ona no agora?
Iha mensajen ba Maromak nia Povu Bispu sira dehan “Ami sente sinseramente devér atu konverte an ba Kristu nia poténsia, ne’ebé iha kbiit atu halo buat hotu sai foun, liuliu ami-nia an ne’ebé kiak. Ho haraik-an ami tenke rekoñese katak Jezús nia eskolante sira-nia pobreza, frakeja, liuliu nia ministru sira-nian, hatodan kredibilidade misaun nian” (n.5). Liafuan hirak ne’e sai dezafiu boot ba dalan konversaun kontínua ne’ebé ita ida-idak presiza halo, atu ita-nia sasin sai kredivel duni.
Mensajen mós oferese dalan ba konversaun ne’e liuliu sentralidade relasaun ho Jezús Kristu: “Molok dehan buat ruma kona-ba forma ne’ebé evanjelizasaun foun ne’e tenke asume, ami sente ezijénsia atu dehan ba imi, ho konviksaun kle’an, katak fiar depende tomak ba relasaun ne’ebé ita harii ho Jezús ne’ebé foti inisiativa atu hasoru ita […] Ami konvida imi hotu atu kontempla Na’i Jezús Kristu nia oin, atu tama iha mistériu ninia ezisténsia nian ne’ebé haraik mai ita iha krús, konfirma filafali iha ninia moris-hi’as husi mate nu’udar Aman nia prezente no haraik mai ita liuhusi Espíritu (n.3)”.
Ita atu hahú tinan litúrjiku foun ho Adventu iha Tinan Fiar nian. Ita husik mensajen husi Sínodu tama kle’an iha ita, hanesan Madre Mazzarello dehan iha Surat 27: “Agora mak tempu loos atu halakan filafali ahi”.
FMA Tatoli hodi nia konteúdu sira oferese ba lee-na’in instrumentu ruma atu tulun halo leitura kle’an no matenek akontesimentu hotu nune’e bele nakfilak ita-nia moris iha Evanjellu ksolok nian ba maun-alin sira, liuliu ba sira ne’ebé fiar malirin ona ka lakon tiha ona.
Bom advento e Boas Festas do Santo Natal!
