Dili – Atu taka Bicentenario Dom Bosco ninia moris, Escola Base Católica Maria Auxiliadora lakohi husik momentu forte no momentu grasa nian ida-ne’e atu liu de’it la hodi husik estudante sira atu esperimenta diretamente Dom Bosco ninia moris espiritual. Nune’e irmán FMA hamutuk ho professores sira organiza atividades edukativu oioin ba estudantes sira, hanesan iha momentu orasaun, momentu edukativu no mós momentu selebrativu. Hahú kedas fulan Maio, Dom Bosco nia naran lapara atu temi, nia ne’ebé nu’udar modelu, aman, mestre-edukador, belun, ba foinsa’e sira.
Nune’e liu tiha CAMPO BOSCO, tuir mai hala’o KONKURSU kona-ba DOM BOSCO nia moris husi Ensino Básico 20 no 30 ciclo. Estudante sira hamutuk iha grupo 12, ho grupo bo’ot ne’e bele haree kedas estudante sira nia hakarak boot atu partesipa maximun iha atividade sira atu festiva Dom Bosco nia moris. Nune’e molok atu hahú konkursu no remata konkursu irm. Olga kongratula ona estudante sira hodi dehan:” imi estuda maka’as no hatene didi’ak Dom Bosco nia moris, parabens tanba imi dekor didi’ak Dom Bosco nia moris maibé la to’o de’it iha ne’e, haka’as an atu moris tuir santu ne’e nia ain-fatin sira, Nia mak ema santu ida-ne’ebé umanu liu, la monu husi lalehan, nia halo ninia dalan hodi moris iha rai ne’e, hanesan labarik, adolesente, foinsa’e ka ema babain, nia moris kiak maibé nakonu ho dignidade, moris kiak maibé nakonu ho matenek Maromak nian, nia moris kiak maibé riku ho Maromak, moris kiak maibé servisu maka’as,… nune’e aprende husi Dom Bosco labele admira de’it nia”.
Konkursu ida-ne’e mós nia finalidade atu hili premiadu sira hodi compete iha dia 4 de Julho nivel municipiu no sira ne’ebé manan sei partesipa iha nivel nasional dia 18 de Jullu.
Nune’e ohin dia 20 de Juñu, estudante husi eskola Maria Auxiliadora remata sira nia konkursu ba semi final hodi hili estudante grupo 2 ne’ebé sei ba tuir iha nivel municipio nian. Estudante sira ne’ebé hetan primeiro prima mak sei partesipa. (MA-Comoro).
