Dili – Saran- an liu husi profisaun relijioza, irmán na’in tolu, Irmán Fatima, FMA, Ir. Onesiana, FMA, no Ir. Marta, FMA, hatudu sira nia hilin ba moris ne’ebé kesi- an ho Maromak no Ninia misaun.
Iha maun- alin sira leet, Maromak kontinua bolu ema nebé Nia hakarak atu moris besik liu tan Nia hodi hala’o misaun salvasaun nian. Iha loron loron 5 Agustu tinan 2015, iha uma fukun Filha de Maria Auxiliadora Komoro-Dili, eventu profisaun relijioza Saleziana irmán Fatima, irmán Onesiana no irmán Marta, ne’ebé preside husi padre Provinsiál, Pe. Virgilio da Silva Carmo no konselebrante, Frei Filipe, hetan partisipasaun másima husi família no irmán sira ne’ebé reprezenta komunidade ida- idak iha Provínsia Timor-Indonesia. Partisipante ba eventu relijiozu ne’e besik ema nain 300.
“Hodi profisaun relijioza, ema ida haklaken nia hili, hodi saran nia liberdade, ne’e katak, nia liberdade ne’ebé nia iha, la’ós ona tomak, maibé iha ona nia batas/ limite”, Pe. Virgilio esplika liután. “Sira ne’ebé hetan bolu atu hala’o Na’i nia misaun salvasaun, tenke sai sinal ksolok nian ba mundu no sai ponte ne’ebé halo ema hotu sai ida de’it no sente maun- alin. Ho liafuan seluk hakarak dehan katak, sira ne’ebé Nai Maromak hili, tenke sai profisionál kona-ba buat nebé Maromak nian, no buat Maromak nian mak sasin ksolok no unidade, nebé presiza hahu husi komunidade laran no sai ba maun alin sira iha liur,” Pe. Virgilio hateten iha nia omilia.
Husik buat hotu la’ós katak husik deit sasan nebé bele hare ho matan ou buat ne’ebé li’ur nian, maibé, liu- liu buat nebé iha laran, katak, husik ita nia hakarak no gostu sira, tanba Maromak hare la’ós buat ne’ebé li’ur, maibé buat ne’ebé iha ita nia laran. Pe. Virgilio hameno ba família irmán na’in tolu nian, atu kontinua suporta oan sira ho sira nia orasaun no reza ba vokasaun relijioza iha família sira, tan Maromak hakarak Nia Lia-Fuan too da’et ba ema hotu- hotu.
Eventu profisaun relijioza ne’e, kontinua ho konfraternizasaun, hafoin, irmán na’in tolu ba ho nia komunidade ne’ebé obediénsia haruka atu bá. Irmán nain rua, Irmán Marta no Irmán Onesiana ba Laga, no irmán Fatima ba komunidade Fuiloro.
(Silvia Lopes/komsos-fmatin)
