Papa Francisco iha kuarta 12 Agostu, hahú sklu foun katekeze nian, maibé nafatin iha kontestu família nian. Santu Padre iha semna sira tuirmai ne’e kona-ba dimensaun tolu ne’ebé artikula ritmu vida família nian: festa, serbisu no orasaun.
RV – Iha katekeze ohin nian, Papa Francisco dedika ba festa. Amu-Papa fó hanoin katak Maromak rasik hanorin importánsia atu dedika tempu ida atu kontempla no desfruta buat ne’ebé, iha serbisu ema halo didi’ak. No la’ós de’it serbisu iha sentidu profisaun nian,maibé asaun hotu ne’ebé mane no feto sira hodi nia kolabora iha obra kriadora Maromak nian.
“Festa mak, uluknanai, hateken domin no agradesimentu nian ba serbosu ne’ebé halo didi’ak”, Papa Francisco esplika. Nia resalta katak, dalaruma, festa bele to’o iha sirkunstánsia difisil sira eh susar nian, maibé, iha momentu sira-ne’e, presiza husu Maromak nia forsa atu keta hamamuk nial kompletamente.
Iha ambiente serbisu nian mós – hodi la husik devér sira – bele halo festa ki’ik-oan ida, Amu-Papa dehan, hanesan atu komemora aniversáriu sira, kazamentu eh oan nia moris. “Importante atu halo festa. Ne’e mak momentu sira familiaridade nian iha engrenajen mákina produtiva nia laran: halo di’ak mai ita!”.
Ko’alia kona-ba serbisu, Papa Francisco destaka katak ema tenke iha konxiénsia boot katak nia la’ós serbisu nia atan, maibé na’i, tanba nia Maromak kria tuir Nia ilas no lalatak rasik. Maibé obsesaun ba lukru ekonómiku bele tau risku ba ritnu umanu moris nian.
“Ttempu repouzu nian, liuliu ida domingu nian, hariak mai ita atu desfruta kona-ba buat ne’ebé labele prodús no la konsome, la sosa no la fa’an. Envezde ida-ne’e, ita haree katak ideolojia lukru nian no konsumu nian hakarak ‘manán’ mós festa: nia mós [festa], dalaruma, redús tiha ba ‘negósiu’ ida, ba modu ida atu halo osan no gasta”, Amu-Papa bolu atensaun.
Papa Francisco konklui hodi destaka katak tempu festa nian sagradu, basá Maromak horik iha nia ho modu espesiál. No família iha kompeténsia boot atu komprende, orienta no apoia valór auténtiku tempu festa nian. “Festa mak prezente folin liu Maromak nian; prezente folin liu ne’ebé Nia haraik ba família umana: ita keta estraga nia!”.
