Ossú – “Sé mak adolexente ohin nian no oinsá hatán ba nesesidade edukasaun adolexente sira-nian ohin”? Ne’e mak tema ida reflesaun nian ne’ebé Irmán Jacinta Gusmão aprezenta ba akólitu rihun ida halibur iha Ossú, ba sira-nia kongresu, iha loron 21 Agostu 2015.
Tanba númeru boot hanesan ne’e, susar atu halo serbisu ho grupu ki’ik. Nune’e dinámika ne’ebé uza mak envolve partisipante sira liuhusi grupu parókia nian ne’ebé hamutuk 16. Konferénsia hahú ho pergunta rua: 1) Sá loos retratu adolexente nian no 2) Perigu sá de’it mak adolexente sira enfrenta ohin, ne’ebé reprezentante husi parókia ida-idak buka hatán ho liafuan ida de’it.
Akólitu sira pinta adolexente sira nia oin ho kór nakukun no naroman. Iha parte ida adolexente no joven sira iha forsa, balun badinas, responsavel, barani, haksolok no entuziazmu atu serví, moris di’ak hodi fó atensaun ba vida morál no espirituál. Husi parte seluk adolexente barak la iha dixiplina, falta edukasaun/respeitu, nakar-teen, foti-an no tama iha mundu droga nian.
Kona-ba perigu boot ne’ebé joven sira enfrenta, akólitu sira identifika internet, liuliu rede sosiál facebook, youtube, whatsapp, nst ne’ebé la uza di’ak bele lori sira atu envolve an iha pornografia, iha hahalok ne’ebé estraga sira-nia mentalidade no morál. Perigu seluk mak droga, violénsia no kriminalidade, no modelu adultu sira-nian ne’ebé la hatudu moralidade.
Adolexente sira konsege identifika núkleu problema iha adolexénsia, katak “krize identidade nian”, basá iha períodu ne’e, foin-sa’e ida buka komprende ninia an rasik, nia sé loos, saida mak nia hakarak ba nia moris, saida mak sosiedade husu ba nia. Adolexente hahú hateke ba kolega/grupu, ba ídolu/”star”/”atleta” ida, ba modelu sira media komunikasuan nian nu’udar modelu, maibé la’ós ba modelu konvensionál sira. Sira atu hetan an rasik koko atu ba kontráriu ba adultu sira liuliu inan-aman sira, hanorin relijiaun nian. Idade ne’e mak idade atu define identidade liuhusi krize identidade nian (hatene sé mak an rasik no sá mak nia fiar) no konfuzaun identidade nian (la seguru kona-ba sé mak an rasik no sá mak nia fiar). Ho modelu oioin ne’e, maski adolexente sira hakarak sai independente, sira sei presiza apoiu, orientasaun husi inan-aman sira, edukadór/a sira, adultu sira, atu bele forma identidade ida konxiente, nakloke, forte, domina an no dezenvolve autonomia pensamentu nian, atu la monu ho laloran “sosiedade nabeen” ohin nian, liuliu husi mundu dijitál/virtuál. Neon krítiku tanba sá? Neon krítiku atu dixerne…tanba mundu reál eh virtuál (internet), hanesan “tasi boot ida ne’ebé ita soe dai bá bele hetan buat di’ak maibé mós venenu” ne’ebé estraga adolexente nia moris.
Iha dada-lia badak, akólitu ida husu oinsá tulun maluk ne’ebé la’o sala dalan. Ir Jacinta rekomenda atu molok ita korrije ema, ita rasik tenke moris uluk loos, basá ita labele fó buat ne’ebé ita la iha. Ita mós korrije ho laran-sadia basá ita hatene katak ita mós ema maksalak. Papa Francisco ba akólitu sira halibur ho nia iha Roma, loron 4 Agostu hateten: «Akólitu doben sira, hodi besik liután ba altár, imi buka hanoin atu ko’alia ho Jezús iha orasaun loroloron nian, imi habosu an ho Na’i nia Liafuan no nia Isin, no imi sei iha kapasidade atu to’o ba maluk sira, hodi lori nu’udar prezente buat ne’ebé imi simu, hodi fó ho entuziazmu ksolok ne’ebé haraik ba imi».
