RV – Iha katekeze ba dala 100 ninia Pontifikadu nian iha kuarta 26 Agostu, Papa Francisco dedika ba orasaun iha ambiente familiár.
Amu-Papa esplika katak tempu la iha mak justifikativa sira ne’ebé sarani sira uza beibeik ba momentu uitoan fó ba orasaun. Defaktu, Papa Francisco admite katak ema ne’ebé iha família ida aprende atu halo oras 24 sai dala rua. “Iha aman no inan sira ne’ebé merese Prémiu Nobel tanba ne’e! Segredu mak domin ne’ebé sira iha ba sira-nia doben sira”.
Papa Francisco konvida sarani sira atu reflete kona-ba domin ne’ebé sira sente ba Maromak, basá nia iha relasaun ho tempu ne’ebé dedika ba orasaun. “Bainhira afetu ba Maromak la halakan ahi, espíritu orasaun nian la hamanas tempu, maibé se Maromak horik karik iha fuan, pensamentu ida lahó liafuan mós eh beiju ida ne’ebé labarik ida haruka ba Jezús sei nakfilak iha orasaun”.
Nu’udar ezemplu, Amu-Papa temi buat furak ita hetan iha inan sira nia atitude atu hanorin oan ki’ik sira atu haruka rein ba Jezús eh Na’i-Feto. Ida-ne’e espíritu orasaun nian, nia hateten, ne’ebé lori atu hetan dame iha buat nesesáriu sira, bainhira moris ho tempu ne’ebé falta nafatin.
Papa Francisco indika nu’udar matadalan di’ak kona-ba dixernimentu entre serbisu no orasaun, Marta no Maria nia istória, haktuir iha Evanjellu ne’ebé lee molok katekeze. Sira aprende ho Maromak armonia ritmu familiár nian: beleza festa nian, serenidade serbisu nian no espíritu orasuan nian.
“Orasaun mosu husi raronak Jezús nian, leitura Evanjellu nian. Imi keta haluha, loroloron lee parte ida Evanjellu nian. Orasaun mai husi intimidade ho Maromak nia Liafuan. Iha família iha intimidade ne’e? Ita iha evanjellu iha uma? (…)Evanjellu ne’ebé lee no medita iha família mak hanesan paun di’ak ne’ebé habosu ema hotu nia fuan”.
Siklu katekeze nian kona-ba família hahú iha 10 Dezembru tinan 2014. Reflesaun sira-ne’e integra iha kontestu Sínodu Família nian, ne’ebé halo nia asembleia dahuluk iha Outubru 2014 no sei taka ho asembleia jerál ordinária ne’ebé sei realiza iha fulan Outubru mai, husi loron4-15, iha Vaticano.
