Ezersísiu espirituál grupu datoluk FMA TIN
Dili – Grupu ikus ba ezersísiu espirituál anuál FMA sira-nian halo iha Dili (Comoro) husi loron 1-8 Setembru 2015. Pregadór mak Mons. Ionuţ Paul Strejac, Konselleiru Nunsiatura Apostólika iha Timor-Leste ne’ebé ho laran-manas no profundidade lori Irmán sira atu hakle’an imajen loos Maromak nian ne’ebé “misericordioso” no konvite atu “sai misericordioso hanesan imi-nia aman misericordioso” (Lc 6,36).
Iha Misa abertura nian ba Espíritu Santu, pregadór konvida Irmán sira atu iha disponibilidade no abertura ba Espíritu. Nia hateten katak, “Evanjelista Lucas mak gia Ezersísiu espirituál ne’e”, evanjelista ne’ebé tradisaun hateten katak nia mak médiku no pintór ida. Defaktu, parte dahuluk ninia evanjellu nian to’o Transfigurasaun) hatudu oinsá Liafuan kura (gregu-terapia) lia-bosok ne’ebé Inimigu tau iha ema husi kedas inísiu umanidade nian katak Maromak mak tiranu ida no kastigadór (jardín Eden). Parte daruak husi Transfigurasaun ba oin, Lucas pinta Maromak nia Oan-Mane nia oin bainhira hala’o nia misaun iha rai, nu’udar laran-sadia, besik ba maksalak sira, haraik-an, serví-na’in.
Ita hatene katak Lucas hakerek obra rua: Evanjellu no Apóstolu sira-nia hahalok no dedika ba Teófilo (ida-ne’ebé hadomi Maromak, sarani di’ak) atu deskobre buat ida, katak “nia la hadomi Maromak, maibé Maromak mak hadomi nia. Salvasaun la’ós hadomi Maromak. Maromak, Nia mak hadomi ha’u; la’ós ha’u mak saran moris ba Maromak, maibé Nia mak saran moris mai ha’u”.
Mons. Ionut dezenvolve meditasaun sira hodi hahú ho: 1) Evanjellu Anunsiasaun nian iha-ne’ebé Lucas aprezenta Maria, nu’udar modelu rona nian, asimilasaun no sasin Liafuan nian; 2) Jezús nia batizmu atu hahú nia misaun, no Aman nia konvite mai ita atu rona nia Oan-Mane; 3) Bem-aventuransa sira nu’udar lalenok vida sarani nian; 4) Feto maksalak no Simaun justu atu hatudu relijozidade loos; 5) Sai laran-sadia/misericordioso, sentru Evanjellu Lucas nian, no oinsá moris sequela ; 6) Ai-knanoik Maromak nu’udar Aman-Inan, ne’ebé la kondena nia oan maksalak sira, maibé haraik hikas fali dignidade oan nian; 7) Misaun atu fó sasin Aman nia laran-sadia; 8) Samaritanu di’ak, oan ne’ebé bá hasoru nia maun-alin sira iha susar; 9) Kontempla Na’i nia krús, hatudu ema loos nia ilas, kiak, haraik an, livre no servi-na’in no signifikadu mate nian nu’udar enkontru ho Aman; 10) Emaus, iha-ne’ebé Jezús Moris-Hi’as ba hasoru ninia apóstolu sira; 11) Sai sasin hodi partilla, horik iha Jerusalém/Kreda no hodi hein Espíritu; 12) Pentekostes, ho don Espíritu nian ne’ebé transforma loron ba loron ita-nia fuan hodi halo sai hanesan Jezús nian, “misericordioso” no dudu ita atu bá iha lurón sira mundu nian ho Na’i nia hateken rasik, ho Na’i nia fuan rasik.
Irmán na’in 28 mak partisipa iha Ezersísiu ne’e no hanesan baibain, iha inspetora nia akompañamentu mós. Nune’e, iha introdusaun ba Ezersísiu espirtuál, Ir Alma Castagna, inspetora FMA TIN nian konvida Irmán sira atu “keta toba… maibé sai vijilante no sóbriu” (1 Ts 5, 6-liturjia loron nian) no atu iha atitude rua “docibilitas” no prudénsia. “Docibilitas” liután “docilitas” signifika disponivel atu aprende eh husik Ida-Seluk eh ema seluk hanorin ha’u. “Prudénsia” atu hatene rai iha fuan buat ne’ebé rona liuliu obediénsia ne’ebé simu, hodi la halekar uluk lai ba mundu tomak. Iha Buona notte tradisionál sira iha loron sira-ne’e, Ir Alma mós aprezenta ba irmán sira tópiku sira ne’ebé iha relasaun ho ámbitu sira hanesan ezemplu fidelidade no radikalidade, pobreza, pastorál juveníl no misaun, komunikasaun…
Ezersísiu Espirituál ne’e sai mós nu’udar preparasaun atu tama iha Eventu Boot “Ano Santo da Misericórdia” ne’ebé sei hahú iha loron 8 Dezembru 2015, solenidade Imakulada Konseisaun no remata iha loron 20 Novembru 2016,solenidade Kristu Liurai nian.
