Provínsia TIN la preokupa de’it atu eduka foin-sa’e sira ho modu integrál (promove dimensaun umana hotu hanesan fízika, intelektuál, relasionál, relijioza, profisionál) durante periódu aprendijazen formál, maibé iha lójika akompañamentu nian, oferese mós oportunidade serbisu nian ba sira. Eduka nune’e mak loos duni tuir Don Bosco no Maria Mazzarello nia estilu katak halo foin-sa’e sira bele uza koñesimentu no kompeténsia ne’ebé nia manán atu hamriik metin ho ain rasik no atu kontribui ba dezenvolvementu sosiedade nian. Ne’e mak fronteira foun obra FMA nian iha TL.
Knaar ida-ne’e entrega ba Komunidade Divina Providénsia, ne’ebé rezide iha Comoro, Dili (Timor-Leste), loke iha 2011. Komunidade aleindé tuir “Centro de Formação João Paulo II”, nia mós jere Sentru “Sewing” ka suku nian no “Mazzarello Bakery and Catering”. Iha foin-sa’e antiga aluna nain 28 no foin-sa’e antigu alunu nain 5 mak serbisu iha fatin sira-ne’e.
Tanba kuaze sira hotu mai husi foho, komunidade mós oferese alojamentu (toba no han) ba empregadu sira-ne’e.
Tuirmai mak vizaun-misaun komunidade Divina Providénsia nian.
Vizaun:
Ami, FMA komunidade Divina Providénsia nian, nakloke no hatán ba antiga/u alunu sira-nia nesesidade atu asimilavalór umanu no saranisira tuir ami-nia SIstema Preventivu, no promove sira atu bele iha asesu ba fatin-serbisu ho dignidade no abilidade profisionál nune’e sir abele oferese kualidade di’ak liu servisu nian iha Timor-Leste.
Misaun:
Oferese formasaun integrál ba foin-sa’e sira, abilidade profisionál no esperiénsia serbisu nian enkuantu moris hamutuk iha hakmatek tuir espíritu famílian nian ne’ebé fó ba sira sentidu hola-parte nian; atu nune’e foin-sa’e sira bele sai protagonista iha vida no kontribui ba sosiedade timorense ho responsabilidade, saran an konstante no kompeténsia nu’udar sarani di’ak no sidadaun onestu.
