Dili – Foin-sa’e feto na’in neen Cesarina Correia, Domingas da Silva, Lourdes de Carvalho, Maria Roste, Virgínia da Costa no Bendita dos Santos, depoizde kompleta estádiu aspirantadu nian no halo avaliasaun kona-ba sira-nia projetu vokasionál, halo ain-hakat ba faze formativa tuirmai, katak, postulantadu.
Postulantadu, tuir Konstituisaun FMA artigu 88 mak períodu ida iha-ne’ebé “kandidata haka’as-an atu haklean Maromak nia bolun, atu realiza neineik-neineik no iha kmaten hadook-an ne’ebé Evanjellu haktuir nune’e nia enkontru pesoál ho Kristu no nia saran an ba maun-alin sira auténtiku liu tan”.
Iha etapa formasaun ne’e, sira sei “haberan liután sira-nia formasuan liuhusi esperiénsia kle’an orasaun nian, no liuhusi vida komunidade no apostólika, preparasaun doutrinál ne’ebé loos no asimilasaun progresiva Don Bosco no Madre Mazzarello nia espíritu” (Konst.88).
Provinsiál FMA, Ir Alma Cstagna ne’ebé aseita sira no fó medalla postulante nian ba sira iha nia liamenon ba Postulante foun sira, foti husi Evanjellu ba selebrasaun ohin, 7 Outubru, loron Na’i-Feto Rozáriu nian, hateten: “Imi buka saida? Jezús nia pergunta ba João nia eskolante na’in rua ne’ebeé tuir Jezús. Nia fó hanoin ba sira atu hanoin nafatin pergunta ida ne’e. Pergunta ne’ebé dala barak Jezús uza. Ezemplu iha to’os Oliveiraa: ‘imi buka saida?’ fó hanoin atu iha momentu susar ka di’ak, ita husu ba ita nia-an ita buka saida. Iha loron profisaun sira mós amlulik sei husu ‘imi husu saida’? Pergunta ne’ebé ita tenke hatán iha momentu hotu iha ita-nia moris nian.
Ita buka Jezús to’o hetan hodi hatan hanesan Sao Paolo nia surat ne’ebé dehan; ‘hau hatene Nia’, Paulo hatene ho fuan tomak, ho nia hakaran tomak; bainhira ita hatene didi’ak Jezús mak ita sei hela ho Nia”.
Irmán Alma fó hanoin mós ba Postulante sira atu aproveita didi’ak sira nia formasaun forma an sai feto di’ak atu nune’e iha futuru bele sai edukadora di’ak iha foin-sae sira nia le’et.
