RV – Iha katekeze loron 16 Dezembru, Papa Francisco ko’alia kona-ba sinál ruma ne’ebé karakteriza Tinan Mizerikórdia nian: hakat Porta Santa, hakbesik ba sakramentu Konfisaun no hadomi no perdua ema hotu.
Papa Francisco destaka katak mizerikórdia no perdaun labela hela de’it nu’udar liafuan, tenek pratika iha moris loroloron nian. “Hadomi no perdua mak sinál konkretu no vizivel katak fiar nakfilak ita-nia fuan sira no permite esprime iha ita Maromak nia moris rasik”.
Sinál boot vida sarani nian, tuir Amu-Papa, nakfilak iha sinál seluk karakterístiku Jubileu nian, hanesan hakat liu Porta Santa, sinál ida konfiansa nian iha Jezús ne’ebé la mai atu julga, maibé atu salva. No salvasaun ida-ne’e gratuita, Papa Francisco subliña. “Salvasaun ne’e la selu ida. Salvasaun ne’e la sosa ida. Jezús mak Odamatan, no Jezús grátis”.
Hakat liu Odamatan Santa mós signifika konversaun loos fuan nian, Amu-Papa dehan. “Tinan Santu sei la iha efikásia boot se ita-nia fuan nia odamatan la husik Kristu liu (…) Nu’udar Odamtan Santu husik nakloke bá, basá nia mak sinál akollimentune’ebé Maromak rasik rezerva mai ita, nune’e mós ita-nia odamatan, ida fuan nian, loke luan nafatin hodi la esklui ema ida.
Konfisaun
Sinál importante seluk Jubileu Mizerikórdia nian mak sakramentu Konfisaun. Hakbesik ba sakramentu ida-ne’e, Amu-Papa haktuir, katak halo esperiénisa direta Maormka nia mizerikórdia nian. “Maromak perdua buat hotu. Maromak komprende ita maski ita-nia limite sira (…) Bainhira ita rekoñese ita-nia salan sira no husu perdaun, iha Lalehan festa: Jezús halo festa”.
Amu-Papa fó hanoin importánsia husu perdaun ba Maromak nune’e mós hatene perdua, maski la’ós knaar ida fasil. Presia loke an atu simu mizerikórdia Maromka nian atu iha kapasidade ba perdaun. “Tanba ne’e, korajen! Mai ita moris Jubileu hahú ho sinál sira ne’ebé komporta forsa boot domin nian”.
