Baucau – Molok festa Natal, sarani barak hakarak prepara an atu selebra didi’ak loron boot ne’e ho retiru no rekonsiliasaun. Grupu ADMA no Apostoladu Orasaun konvida Ir Jacinta Gusmão atu prepara sira ho reflesaun ida iha loron 21 Dezembru. Tema ba reflesaun mak “Obra mizerikórdia nian”. Amu-Papa Francisco husu iha Bula Misericordiae Vultus hateten: “Ha’u nia dezeju boot mak povu sarani reflete, durante Jubileu, kona-ba obra sira mizerikórdia korporál no espirituál. Ne’e mak maneira ida atu fanun ita-nia konxiénsia, dala barak dukur iha drama pobreza nia oin, no tama ba beibeik iha Evanjellu nia fuan, iha-ne’ebé ema-kiak sira mak privilejiadu sira mizerikórdia divina nian. Jezús nia pregasaun aprezenta mai ita obra mizerikórdia sira-ne’e, atu ita bele haree se ita moris eh lae nu’udar ninia dixípulu sira. Mai ita deskobre hikas fali obra sira mizerikórdia korporál: fó han ba ema hamlaha, fó hemu ba ema hamrook, fó hatais ba ema isin tanan, simu ema la’o-rai sira, fó asisténsia ba ema moras sira, vizita ema dadur sira, hakoi ema mate sira. No ita keta haluha obra mizerikórdia espirituál sira: fó konsellu ba ema laran rua-rua, hanorin ema ignorante sira, korrije ema maksalak sira, konsola ema laran-susar sira, perdua salan sira, suporta ho pasiénsia ema sira ne’ebé halakon ita-nia pasiénsia, harohan ba ema moris no ema mate sira”.
Reflesaun hahú ho leitura Evanjellu Mt.25, 31-46. Evanjellu nia pasajen ne’e iha kontestu juizu finál, bainhira iha loron ikus Maromak sei husu konta mai ita kona-ba ita-nia moris, nia sei ezamina de’it se ita hala’o “karidade” eh lae; sai ema mizerikordiozu eh lae. Hala’o obra sira mizerikórdia nian komunika grasa ba ema ne’ebé hala’o. Iha evanjellu S. Lucas nian, Jezús dehan: ‘Imi fó, no sei fó ba imi. Tanba ne’e, ho obra sira mizerikórdia nian ita halo Maromak nia vontade, ita fó buat ruma ita-nian ba ema seluk no Na’i promete katak nia sei fó mós mai ita buat ne’ebé ita presiza.
Husi parte seluk, modu ida atu halakon kastigu ne’ebé hela iha ita-nia klamar ba ita-nia salan sira ne’ebé perdua ona mak liuhusi obra/hahalok di’ak sira. Obra di’ak sira, mak “obra sira mizerikórdia nian. “Rahun-di’ak ba mizerikordiozu sira, basá sira sei hetan mizerikórdia” (Mt 5, 7), ne’e.
Obra sira mizerikórdia nian mós halo ita sai hanesan liután ho Jezús, ita-nia modelu, ne’ebé hanorin ita oinsá ita-nia atitude ba ho ema seluk. Iha evanjellu S. Mateus nian ita hetan Kristu nia liafuan hanesan tuirmai ne’e: “Imi keta haloot hamutuk murak iha rai, ne’ebé meak ho ular han mohu no na’ok-teen sira sobu lutu hodi na’ok. Maibé imi halibur murak iha lalehan, iha ne’ebé ular no meak la hamohu sira, na’ok-teen sira mós la sobu lutu hodi na’ok. Basá iha fatin ne’ebé ó tau ó-nia murak, ó-nia fuan sei hela mós iha ne’ebá” (Mt 6,19-21). Hodi tuir Na’i nia hanorin ida-ne’e mai ita troka rikusoin rai ne’e nian ho rikusoin rohan-laek nian, ne’ebé tebes duni iha folin. Hodi halo nune’e, odamatan mizerikórdia nian sei loke mai ita iha loron “juizu finál”.
Molok retiru-na’in sira hakbesik konfisaun, Ir Jacinta halo sira dada husi kaixa-oan ida, obra mizerikórdia ida atu hala’o iha tinan Jubileu nia laran. Sira ida-idak foti ida no haksook ho mensajen ne’ebé sira simu, hanesan Maromak nia hakaran rasik ba sira. Balun husu tan atu dada ba sira-nia maluk ne’ebé la partisipa atu sira lori ba sira nune’e mós lori ba iha sub-sentru sira mós bele hala’o obra sira.
