RV – Papa-Bento XVI kontinua iha kuarta, 30, reflesaun kona-ba “Kredu” – profisaun fiar katólika, hanesan nia halo ona iha semana kotuk, bainhira ko’alia kona-ba “Ha’u iar Maromak”.
Iha reflesaun daruak ne’e, Santu Padre konsentra ninia hanoris iha definisaun dahuluk kona-ba Maromak ne’ebé Kredu aprezenta: Nia mak Aman. Bento XVI destaka katak bainhira ita profesa Maromak nia paternidade, ita fiar iha nia domin nia kbiit ne’ebé iha nia Oan mate no moris hi’as, manan ódiu, buat aat, salan no loke moris rohan-laek ba sira ne’ebé fiar.
“Dehan ‘Ha’u fiar Maromak bele hotu-hotu’, iha nia kbiit, iha nia nu’udar Aman, mak hahalok fiar nian, konversaun nian, transformasaun ba ita-nia hanoin, ba ita-nia domin, ita-nia modu moris nian”, Amu-Papa esplika.Amu-Papa dehan katak rekoñese Maromak nu’udar Aman mak knaar ida difisil tanba estilu moris ohin loron nian. Tuir Bento XVI, vida familiár oras ne’e hetan difikuldade oioin tanba kompromisu serbisu nian ne’ebé ezijente lu, preokupasaun sira, difikuldade ekonomia, invazaun meiu komunikasaun sosiál iha moris loroloron…
Ho buat sira-ne’e referénsia ba paternidade hetan prejudísiu. “Ba sira ne’ebé hetan esperiénsia aman ida autoritáriu demais no infleksivel, ka indiferente no ladún hadomi, ka mós auzente, la’ós fasil atu hanoin ho hakmatek iha Maromak nu’udar Aman no saran an ba Nia iha konfiansa”, dehan Amu-Papa.
Maski nune’e Amu-Papa, dehan katak iha Evanjellu ita bele haree Maromak nia figura nu’udar Aman, liuliu iha Jezús nia Mistériu Paskál. “Maromak mak Aman ne’ebé nunka husik nia oan sira, Aman ida hatene hadomi no tahan, tulun, simu, perdua, salva, ho fidelidade ida ne’ebé hakat liu ema sira-nia fidelidade, atu loke iha dimensaun ida eternidade nian.”
Atu taka nia reflesaun, Amu-Papa harohan hodi husu ba ita hotu don filiasaun nian “atu moris iha plenitude realidade Kredu nian, iha saran an ho konfiansa ba Aman nia domin no ba ninia laran-sadia ne’ebé boot tebes” ba ita nia salvasaun.
