Liturjia domingu ne’e nian koloka iha sentru ita-nia reflesaun nian, Jezús nia figura: sé mak Nia no sá loos impaktu husi ninia proposta moris nian mai ita? Maromak nia Liafuan ohin nian dudu ita atu deskobre iha Jezús “mesias” Maromak nian, ne’ebé realiza ema sira nia libertasaun liuhusi domin no don moris nian; no konvida “sarani ida-idak” ba identifikasaun ho Kristu – katak, “lori krús”, halo moris rasik don iha laran-luak ba ema seluk.
Evanjellu konfronta ita ho Jezús nia pergunta: “no imi dehan Ha’u sé loos?”. Hamutuk, aprezenta Jezús nia dalan mesiániku nu’udar dalan ida domin no krús nian. “Koñese Jezús” katak adere ba Nia no tuir Nia iha dalan saran-an nian, doasaun nian, domin totál nian.
Leitura dahuluk aprezenta mai ita profeta ida ema “sona borus”, ne’ebé ho ninia saran-an lori konversaun no purifikasaun ba maluk sidadaun sira. Revela mós katak, dalan entrega an nian la’ós dalan frakasu nian, maibé dalan ne’ebé hahoris moris foun mai ita no ba ema seluk. João, autór Evanjellu Dahaat nian, identifika figura profétika ne’e ho Kristu rasik.
Leitura daruak reforsa mensajen jerál liturjia domingu ne’e nian, hodi insiste katak ema sarani tenke “hatais an” ho Jezús, hakribi egoízmu no loko-an no la’o iha dalan domin no saran an nian. Dalan ne’e halo fiar-nain sira sai família ida mesak maun-alin sira-nian, iha dignidade hanesan no erdeiru moris nakonu.
