RV – Iha katekeze kuarta, 10 Agostu, Amu-Papa nia reflesaun ba sarani sira konsentra iha pasajen evanjélika “foin-sa’e ida nia moris-hi’as”. Ne’e milagre boot ida, maibé pontu sentrál narrasaun nian la’ós “milagre”, Papa Francisco destaka, maibé Jezús nia ternura ho foin-sa’e mane nia inan.
Download
Papa Francisco esplika katak mizerikórdia hatudu an iha ne’e nu’udar Jezús nia kompaixaun boot ba feto, ne’ebé lakon nia la’en no, agora, akompaña nia oan-mane mesak ba semitériu. Inan ne’e nia terus boot halo Jezús nia laran-susar, to’o pontu realiza milagre moris-hi’as nian ba ninia oan-mane.
Haree feto ne’e, Jezús iha kompaixaun no, ho mizerikórdia boot, nia kona kaixaun no enfrenta mate. “Durante Jubileu ne’e di’ak atu ita, hodi hakat liu Odamatan Santa (Porta Santa), ‘Odamatan Mizerikórdia’ nian, peregrinu sira buka hanoin epizódiu Evanejllu nian ida-ne’e. Bainhira Jezús haree feto ne’ebá ho matan-been, nia tama iha Jezús nia fuan. Hodi hakat Porta Santa ita ida-idak lori moris rasik, ho nia ksolok no terus sira, projetu no falénsia sira, dúvida no ta’uk sira, atu parezenta sia ba Maromak nia mizerikórdia”.
Ita presiza konxiente, Santu Padre enfatiza, katak iha Porta Santa, Maromak hakbesik ema ida-idak atu oferese ninia liafuan konsoladora nia kbiit: “Keta tanis”. “Ne’e mak odamatan enkontru nian entre umanidade nia terus no Maromak nia kompaixaun. Hodi hakat liu Odamatan Santu, ita realiza ita-nia peregrinasaun iha ámbitu mizerikórdia Maromak nian, ne’ebé ohin repete mai ita, hanesan halo ba joven matebian: ‘Hamriik bá’. Jezús nia liafuan kbiit-na’in iha ita, iha pasajen husi mate ba vida halo ita moris hi’as, haraik esperansa mai ita, habiit fuan sira no lori ita hakat liu terus no mate”.
Iha relasaun ho epizódiu bíbliku, Jezús fó hikas oan-mane ba nia inan. Nune’e, nia sai hikas inan ba dala rua. Inan no oan koko Na’i nia mizerikórdia konkreta. Nia bá hasoru nia povu, umanidade. Nia mak Odamatan ne’ebé lori salvasaun no fó hikas moris foun. Ninia mizerikórdia lori ba obra sira mizerikórdia nian, Amu-Papa konklui katekeze.
