Dili – Durante Ir. M. Assunta Sumiko Inoue nia vizita breve ba loron tolu iha noviziadu, iha loron 25 Agostu lokraik, nia hasouru ho novisa sira nain sia. Enkontru ne’e hahu ho orasaun ba Maria. Tema ba nia ‘conferenza’ mak : “Halo FMA nia moris tau abut iha Maromak nia Liafuan.”
Objetivu formasaun nian mak ema nia maturidade integral iha konfigurasaun gradual ho Kristu ne’ebe kastu, kiak no obediente. Tempu novisiadu nian mak tempu atu haklean Konstituisaun no moris tuir. Nia mak sai ita nia Biblia daruak atu medita, reflete no tau iha moris. Ita nia Konstituisaun mak livru ne’ebe presiza hanahas , laos rai didiak iha fatin ruma. Tan ne’e presisa atu loke, lee nafatin atu hamanas ita nia moris. Se ita hadomi Don Bosco, Madre Mazzarello no Institutu , ita hadomi mos Konstituisaun hodi moris tuir iha konkretu.
Hodi lee Konstituisaun, bele mos haklean Maromak nia Liafuan. Iha ita nia Konstituisaun nia kapitulu ida-idak bele hetan sitasaun biblika atu medita.
Nu’udar novisa ne’ebe hola parte ona ba Institutu, ami buka atu estuda, haklean, no moris tuir iha moris lor-loron regra sira ne’e no halo nia nu’udar ami nia evanjellu pesoal hodi medita nia no imprime iha ami nia fuan atu asimila iha moris tomak.
Ir. Assunta fahe mos ninia esperiensia ruma ne’ebe hariku ami .
Ir. Assunta kontente atu hasoru ami , tanba tuir nia, ami mak esperansa, laos deit Inspetoria nian , maibe Institutu tomak nian. Ho ami sei harii futuru no karisma salesianu sei kontinua iha ami ho kriatividade.
(Novisa Cesarina Correia Marques)
