Husi irmán Dolores Ribeiro
Ksolok mak karakteristika ida ne´ebè mos hola parte iha Espiritu Salezianu, ne´ebè hori uluk kedas Don Bosco no Madre Mazzarello nafatin rekomenda ba nia oan sira atu haksolok nafatin liuliu haksolok iha Nai ho ksolok ne´ebé loos.
Venilale – Tinan-tinan ema ida-idak simu grasa moris nian husi Na’i nune´e horisehik, iha loron 14 Abríl, iha S. Domingos Savio Venilale ami selebra festa tinan nian ba labarik sira hotu ne´ebé halo tinan. Tanba labele halo hotu durante tinan ida nian nune´e ami nafatin fahe ba fulan tolu ka fulan haat atu halo festa hamutuk, nune´e ohin ami halo festa ba sira ne´ebé moris iha fulan Janeiru, Fevereiru, Marsu, no Abríl. Entre labarik sira iha mós Irmán nain rua ne´ebé hola parte iha aniversáriu ne´e: Ir. Maria Letizia FMA no mos Ir. Noemia de Deus FMA. Iha festa ne´e ami hahú ho orasaun hamutuk hodi agradese Nai ba grasa moris nian ne´ebé ita simu loroloron, ba ida-idak nia família no mós ba benfeitór sira ( materiál no espirituál) ne´ebé ho laran luak prontu nafatin atu tulun ami iha ami-nia dalan moris nian; hafoin kontinua ho ko´a kek ba sira ne´ebé halo tinan, depois halo jogu hamutuk (puzzle Evanjellu nian). Hotu tiha ne´e ida-idak ba foti nia prezente no ikus ami halo merenda hamutuk. Ami hotu sente haksolok atu selebra festa hamutuk nu´udar família ida iha Na´i nia naran no ami fiar katak ho ksolok loos ne´ebè ami iha ho sira bele hametin liu espíritu família nian no bele tulun malu diak liu tan ba dalan santidade nian.
