Baucau – Iha loron Domingo 6/11, komunidade St. Teresa de Ávila–Baucau halo festa agradesimentu nian. Gratidaun mak atitude umildade iha ne’ebé ema rekoñese buat di’ak ne’ebé nia simu iha nia moris. Atitude gratidaun mós nu’udar espresaun fuan nian ne’ebé hamosu admirasaun ba kmanek sira no esperiénsia hotu ne’ebé liu ona. Ho pensamentu ne’e komunidade hamutuk ho grupu oi-oin ne’ebé hola parte iha komunidade edukativa halo festa agradesementu nian, hodi hato’o ba malu sentimentu agradese nian ba esperiensia hotu ne’ebé halao durante tinan ida ne’e. Objetivu husi festa ida ne’e mak uluknanai atu agradese Maromak ba grasa hotu ne’ebé Nia haraik mai ami ida-idak. Aleinde ida ne’e mos atu agaradese ba grupu ida-ida ne’ebé hola parte ba komunidade edukativu no liu-liu ho modun espesiál atu agradese ba Me. Jacinta Gusmão nia prezensa durante tinan tolu iha komunidade Baucau.
Selebrasaun hahú ho Eukaristia ne’ebé prezide husi amu-pároku katedrál Baucau, Pe. Justiniano. Iha nia omilia Pe. Agradese ba Me. Jacinta ne’ebé durante tinan tolu halo buat barak iha komunidade no parókia. Nia unifika nafatin grupu hotu no envolve sira iha atividade komunidade nian. No liu-liu nia akresenta katak buat diak ne’ebé halao durante tinan tolu nia laran mak vizita família sira iha bairo-bairo. Amu Justinianu apresia tebes atividade ida ne’e tanba ho ida ne’e mak bele hatene direitamente realidade sira ne’ebé família sira enfrenta. Buat seluk tan mak iha Me. Jacinta nia tempu mak foin hahú grupu infánsia misionária nian iha parókia katedrál ( 8/12/2013) ne’ebé sai buras no aumenta ba bei-beik too ohin loron. Buat hirak ne’e manifesta madre nia entuziasmu pastorál iha parókia no komunidade. Amu-pároku hodi parókianos hotu nia naran hatoo agradese wain ba madre nia dedikasaun durante tinan tolu iha Baucau.
Depoizde misa amu-pároku fila kedas tanba iha enkontru iha parókia maibe molok ba dala ida tan nia agradese tebes ba Me. Jacinta ba nia kontribuisaun iha parókia no mos haburas grupu oioin hodi sensibiliza atu hola parte iha atividade pastorál nian. Grupu oioin buras hanesan oratóriu sira, Laura no infánsia misionária nebe maske kiik maibé envolve ona sira iha atividade oi-oin iha komunidade no mos iha parókia nune’e maske kiik sira aprende ona atu loke matan ba ema seluk nia presiza.
Iha festa ida ne’e, madre Jacinta Gusmão nu’udar superiora komunidade ida ne’e ninian, la haluha husik hela nia lia-menon liu-liu ba labarik, Foin-sa’e no família sira ne’ebé partisipa iha festa ida ne’e. Iha madre nia lia-menon nafatin motiva sira atu kuda valór sira iha moris no valór sira ne’e uluk nanain hetan husi família ka inan-aman. Nune’e família ida-idak buka atu fó atensaun ba oan sira nia edukasaun hodi transmite ho loloos valór sira ba sira nia oan. Ba labarik no foin-sa’e sira madre husu atu hala’o didi’ak sira nia obrigasaun nu’udar oan tanba futuru di’ak la’os de’it mai husi inan-aman maibé depende mós ba ida-idak nia haka’as-an atu sai di’ak. Iha lia-menon sira ne’e, madre koko atu fahe nia esperiénsia rasik oinsá nia simu edukasaun husi família. Madre Jacinta hateten katak “Baucau la’os fatin foun ba nia tanba Baucau hanesan nia moris fatin no fatin simu edukasaun.”
família madre hetan valór sira ne’ebé suporta madre atu hatán ba Maromak Nia bolun, liu-liu tanba madre mai husi ambiente ida ne’ebé tane aas liu valór relijiozu sira, iha ne’ebé família sira sai ezemplu ba moris selibadu no relijioza nian. Husi tiu nain rua ne’ebé sai amululik no tia ida ne’ebé sai relijioza Canossiana, sai nu’udar ezemplu ba madre atu hatan Sim ba Maromak Nia bolu ho radikalidade. Ho lia-menon hirak ne’e, madre hakarak fó hanoin ba labarik, foin-sa’e no família sira atu hatene rona no halo tuir Maromak nia hakarak iha sira nia moris loron-loron nian no keta monu ba babeur materializmu nian.
Hotu tiha lia-menon husi madre, kontinua kedas ho seremónia ko’a keek. Iha seremónia ida ne’e reprezentante husi grupu oin-oin; ADMA, Inan-aman, Antigas alunas (AA), Animadores, Laura Vicuña (LV), Komunidade Edukativa (KE), Oratorianu no IM mai akompaña madre hodi ko’a keek nu’udar simbolu “harmonia iha diversidade.” Seremónia ko’a keek hotu tiha, kontinua ho momentu konfraternizasaun hodi han hamutuk. Hafoin ida ne’e madre foti tempu badak ida atu halo avaliasaun ho reprezentante husi Grupu ou Komunidade Edukativa ne’ebé partisipa iha programasaun Inspetoriál kona-ba projetu komunitáriu hodi haree liu-liu kona-ba atividade pastorál ne’ebé hala’o hamutuk durante tinan ida nia laran. Hotu tiha avaliasaun, grupu ida-idak kumprimenta madre hodi agradese ba madre nia akompañamentu, suporta, domin, ksolok no sasin moris ne’ebé hatudu durante fahe esperiénsia hamutuk.
Sentimentu gratidaun nian ida ne’e, grupu ida-idak espresa liu-hosi kantu, dansa, drama no balun espresa liu-hosi liafuan. Ikus liu reprezentante ADMA nia hato’o sentimentu agradesimentu nian hodi fo rekordasaun ba madre ne’ebé durante ne’e sai nu’udar grupu ADMA nia animadora. Nune’e sira husu atu madre kontinua akompaña nafatin sira ho orasaun maske tenke husik hodi ba fatin seluk. Iha momentu ida ne’e mós madre hato’o agradese ba oportunidade atu fahe esperiénsia hamutuk iha misaun liu-liu ba ida-idak nia kolaborasaun iha komunidade no mós iha misaun.
Atividade festa agradesimentu nian ida ne’e la’o ho di’ak no susesu tanba ema hotu nia kontribusaun atu fó buat ne’ebé sira iha nu’udar família ida. Ho klima família nian ida ne’e, ida-idak buka atu agradese ba malu liu-liu ba ema ida-idak nia prezensa, ksolok, kolaborasaun no dedikasaun hodi tulun malu iha misaun ne’ebé hala’o hamutuk hodi agradese liu-liu ba madre Jacinta nia prezensa ne’ebé nafatin unifika no suporta iha apostoladu hodi harii harmonia iha diversidade.
Buona festa, Obrigada madre!
(Albina do Carmo – Miranda da Cruz)
