Fuiloro – Loron 10 fulan dezembru, nudar loron importante ba ami nia komunidade Morano Fuiluro. Foinsa’e feto sira ne’ebé remata sira nia formasaun durante tinan 1, halo sira nia graduasaun. Molok atu halao serimonia graduasaun, iha loron antes (09-12) hahu ho retiru ne’ebé prega husi Pe. Antonio Transfigurasaun, SDB. Reflesaun ne’ebé Padre apresenta mak husi pasajen evanjellu ne’ebé dehan “ keta tauk tanba iha Ha’u Aman nia uma iha fatin wain”.liu husi pasajen ida ne’e nia enkoraja foinsa’e sira atu iha atenbrani ba hasoru sira nia futuru, la bele tauk atu lao ba oin hodi buka buat ne’ebé sira hakarak , atu bele realiza sira nia mehi, tanba ema ida-idak mak uniku no especial ne’ebé Maromak kria. Ema ida-idak Maromak fo kapasidade oioin, nune’e sai feto ne’ebé forte no brani hamrik mesak hodi la depende ba ema seluk, hatene deside no hili buat ne’ebe diak ba ninia moris, pronto atu lao ba oin hodi hari’i futuru ne’ebé diak ba moris. Aleinde fahe reflesaun, iha mos konfisaun ba menina sira ne’ebé atu halo graduasaun.
Depois de atividade ne’e, iha loron tuir fali, iha sermonia graduasaun ba menina 53 ne’ebé remata sira nia formasaun no estajiu. Serimonia graduasaun ida ne’e halao iha GYM Don Bosco fuiluro, partisipante sira iha serimonia ne’e mak, inan aman sira, repzentante husi Governu balun, (formasaun Jurídika, INDIMO ), Padres no ita nia Madre Provinsial. Serimonia ne’e hahu ho missa ne’ebé preside husi Pe. Transfigurasaun, Pe. David no Pe. Alarico. Iha Pe. Nia omilia nia koalia barak kona ba “ AGRADESE “ maske leitura sira loron ne’e nia ladun iha relasaun, maibe Padre interese tebes atu koalia kona eventu gratidaun nian. Pontus furak ne’ebé Padre koalia kona ba hahalok agradese, hodi foti ema matenek balun nia teoria, katak wainhira ema hatene agradese iha parte fiziku nian fo isin diak ba nia saude, fo enerjia positivu barak ba ema nia moris. Iha parte psikolojika nian halo diak moris espiritual/klamar nian, hatene agradese iha relasaun social ne’e katak halo diak liu tan relasaun. No ikus liu Pe. remata hodi fo lia menon badak ba graduada sira katak “ aprende atu hatene fo obrigado ba Maromak, ba familia no ema hotu-hotu, tanba hatene agradese mak hatudu ema nia haraik-an, domin no apresiasaun.
Wainhira misa remata, kontinua kedas ho diskurso sira, uluknanain husi repsentante governu, chefe INDIMO, Senhor Paulino Albino nia mensajen ba graduada sira, “ Tenki sai ema ne’ebé responsabel iha moris, aproveita didiak teknolojia hodi buka informasaun diak, sertifikadu mak nudar tiket ida ba viajen moris nian, tan ne’e aproveita didiak ba imi nia esperiensia atu nune’e bele hamrik metin nafatin ”. Lia menon husi Me. Provinsial Me. Alma Castagna no Me. Sebastiana mak: “Matenek ne’ebé hetan laos atu rai deit, maibe tenke aplika iha sosiedade no keta rai sertifikadu, tan sertifikadu sei la fo fuan, maibe hamrik metin ba mundo serbisu moris nian, sai menina ne’ebé diak no los ba ita nia rai no sosiedade”. Ida ne’e mak lia menon 
badak husi formador/a, edukador/a sira ba menina graduada sira, la to’o deit iha ne’e maibe molok atu taka diskurso sira iha mos liafuan agradese husi repsentante graduada ne’ebé sira nia hanoin no sentimentu, husi menina , Martina Delima: “ agradese Centru Formasaun Secretariada Fuiloro, tanba iha ne’eba ami aprende buat barak, oinsa atu sai Sekretaria ne’ebé kualidade no la to’o deit iha ne’e, maibe forma ami atu sai ema ne’ebé matura integralmente”. Wainhira remata tiha diskursu sira, nudar sira nia agradesementu ba formador/a, no inan Aman, sira dedika musika agradese nian, fo aifunan no tara tais ba sira.
Serimonia ne’e remata ho almosu hamutuk iha refetoriu menino sira nian.
(Maria Sarmento)
