Iha inísiu ita-nia dalan kuarezmál, Maromak nia Liafuan konvida ita ba “konversaun” – katak, tau fali Maromak iha sentru ita-nia ezisténsia nian, atu aseita komuñaun ho Nia, atu rona ninia proposta sira, atu konkretiza iha mundu – ho fidelidade – ninia projetu sira.
Leitura dahuluk afirma katak Maromak hakiak ema ba ksolok no ba moris nakonu. Bainhira ita rona Maromak nia proposta sira, ita koñese moris no ksolok; maibé, bainhira ita sees husi Maromak no taka iha an rasik, ita inventa eskema egoízmu nian, foti-an nian no prepoténsia nian no harii dalan terus no mate.
Leitura daruak propoin mai ita ezemplu rua: Adão no Jezús. Adão reprezenta ema ne’ebé hili atu la tuir Maromak nia proposta no deside mesmesak, dalan salvasaun no moris nakonu nian; Jezús mak ema ne’ebé hili moris iha obediénsia ba Maromak nia proposta sira no moris iha obediénsia ba Aman Maromak nia projetu sira. Eskema Adão nian hamoris egoízmu, terus no mate; eskema Jezús nian hamosu moris nakonu no definitivu.
Evanjellu aprezenta, ho forma momoos, Jezús nia ezemplu. Nia lakohi– ho forma absoluta – moris ida sees husi Maromak no ninia projetu sira. Maromak nia Liafuan garante katak, iha perspetiva sarani, vida ida ne’ebé lakohi tuir Aman Maromak nia projetu no metin ba eskema realizasaun pesoál mak vida ida ne’ebé lakon no lahó sentidu; no katak tentasaun tomak atu la tuir Maromak no ninia proposta sira mak tentasaun diabólika ne’ebé ema sarani ida tenke rejeita.
